Полската фудбалска репрезентација денес и гостува на Македонија во натпревар од квалификациите за ЕП 2020. Дел од навивачите кои уште вчера пристигнале во Скопје, веќе успеале да предизвикаат инцидент во центарот на градот.
Според Министерството за внатрешни работи, четири полски навивачи започнале вербална расправија во кафуле на плоштадот “Македонија“, а откако расправијата се претворила во физичка пресметка, реагирала и полицијата. Заради инцидентот четворица фанови на полската репрезентација се приведени, a од видеото се гледа дека полицијата имала сериозна задача да ја расчисти мешаницата во која учествувале поголем број навивачи.
– Вчера во 20:00 часот во СВР Скопје било пријавено дека во угостителски објект на Плоштад “Македонија” бил нарушен јавниот ред и мир од полски навивачи кои се дојдени да го следат фудбалскиот натпревар помеѓу нашата и репрезентацијата на Полска. Полициски службеници излегле на местото и во Полициската станица Центар биле приведени лицата П.М.Б.(30), П.В.(38), K.K.(26) и С.В.Б.(40), сите државјани на Република Полска, за понатамошна постапка“, се вели во соопштението од МВР.
Според спортските коментатори поддржувачите на Полска од трибините важат за едни од највоинствените во Европа.