Познатиот готвач Нусрет Гокче (Гокче) , наречен Солт Бае, налути многумина по финалниот натпревар на Светското првенство во Катар кога непоканет влезе на теренот додека Аргентина ја славеше титулата светски првак.
Гокче успеа да позира со трофејот, а со објавените фотографии и видеа дополнително ја згрози фудбалската јавност. Ниту фудбалерите на Аргентина не беа воодушевени, напротив.
На никого не му е јасно како успеал да влезе на теренот. Многумина побараа одговор на тоа прашање од организаторите на Светското првенство и од ФИФА, но тие се уште официјално не се огласија.
Сепак, веќе се шпекулира дека Солт Бае сигурно ќе биде казнет поради прекршување на протоколот на ФИФА и дека ќе добие забрана за присуство на Светското првенство кое за четири години ќе се игра во Америка, Канада и Мексико.
Организаторите на најстарото фудбалско натпреварување во Америка, УС Опен Купот, вчера на Твитер објавија дека на Нусрет му е забрането да присуствува на финалниот натпревар од ова натпреварување следната година.
-Вака сакаме да кажеме дека на Нусрет му е забрането да доаѓа во финалето на ова натпреварување во 2023 година – пишуваше на Твитер.
Малку е веројатно дека готвачот планирал да го следи тој натпревар, но се претпоставува дека ова е само една од низата забрани што ќе ги добие Солт Бае.
