По воздушните напади на САД и Израел врз територијата на Иран и првиот бран на ирански ракетен одговор, Министерството за надворешни работи на Исламската Република Иран даде официјално соопштение. Во остра изјава, Техеран ги окарактеризира нападите како „криминална воена агресија“ и најави решителен и легитимен одговор.
Министерството потврди дека целите на американско-израелските напади биле одбранбената инфраструктура, како и цивилните објекти во различни ирански градови.
Техеран особено го истакнува времето на овој напад, нагласувајќи дека се случил во исклучително чувствителен момент за муслиманите, како и за иранскиот народ.
„Америка и ционистичкиот режим утрово, во пресрет на Норуз (иранска Нова Година) и на десеттиот ден од светиот месец Рамазан, со флагрантно кршење на територијалниот интегритет и националниот суверенитет на Иран, нападнаа голем број цели во нашата земја“, се вели во соопштението.
Иранската дипломатија тврди дека нападот се случил додека Иран и САД биле во дипломатски процес. Како што наведуваат, иако знаеле за намерите на „САД и ционистичкиот режим“, Техеран ги продолжил преговорите за да ја докаже својата исправност пред меѓународната заедница и да покаже дека „нема легитимно оправдување за агресија“.
Министерството за надворешни работи соопшти дека иранскиот народ направил сè за да избегне војна, но дека сега „дошло време да се брани татковината“.
Воздушните напади беа окарактеризирани како кршење на член 2, став 4 од Повелбата на ОН и како јасна вооружена агресија. Техеран се повикува на член 51 од Повелбата на ОН, нагласувајќи дека нивниот ракетен одговор е законско и легитимно право на самоодбрана. Според Министерството, вооружените сили на Иран се поподготвени од кога било и ќе ги искористат сите свои капацитети за да го одвратат непријателот.
Иран упати итен апел до Генералниот секретар на ОН и до Советот за безбедност, барајќи итна акција за нарушување на меѓународниот мир. Тие, исто така, ги повикаа сите земји-членки на ОН, особено регионалните и исламските земји, недвосмислено да ја осудат оваа агресија, која „го доведува регионот и светот до невидена закана“.
„Сега, во време кога дојде големиот тест на историјата, вооружените сили на Исламската Република Иран, инспирирани од големото епско наследство на оваа земја, потпирајќи се на Семоќниот Аллах, верувајќи во ветувањето за божествена победа и потпирајќи се на националната моќ, нема да се двоумат да ја бранат нашата сакана татковина со сета своја моќ. Историјата е сведок дека Иранците никогаш не се предале на странска агресија; и овој пат, одговорот на иранскиот народ ќе биде одлучувачки и ќе ги натера агресорите да се покаат за својот злосторнички чин. Да живее Иран“, се заклучува во соопштението.
The post Прва порака од Техеран по нападот: Нè нападнаа среде Рамазан, ќе ги натераме горчливо да зажалат appeared first on Во Центар.
