Во 2024 година, бројот на случаи на мали сипаници се зголеми двојно, достигнувајќи го највисокото ниво во последните 25 години, објавија Светската здравствена организација и УНИЦЕФ. Овие институции повикаа на итни мерки за подобрување на стапката на вакцинација, која опадна за време на пандемијата на Ковид-19.
Во Европа и Централна Азија, на подрачјето кое опфаќа 53 држави, минатата година беа забележани 127,350 случаи, од кои повеќе од 40 проценти од случаите беа кај деца под пет години.
Ханс Клуге, регионалниот директор на СЗО за Европа, истакна дека враќањето на сипаниците е знак за будење.
Тој нагласи дека по намалувањето на имунизациската покриеност за време на Ковид-19, бројот на случаи значително се зголемил во 2023 и 2024 година. Многу земји сеуште не успеале да ги вратат нивните стапки на вакцинација на нивоата пред пандемијата. СЗО потенцира дека сипаниците се еден од најзаразните човечки вируси, со инфекции кои можат да предизвикаат сериозни компликации како пневмонија, енцефалитис и дехидрација, и да ја нарушат имунолошката одбрана.
Во Босна и Херцеговина, Црна Гора, Северна Македонија и Романија, според СЗО, помалку од 80 проценти од децата квалификувани за вакцина добиле прва доза против сипаници во 2023 година, што е значително под неопходната стапка на покриеност од 95 проценти за спречување на можни епидемии.
Иако нема лек за малите сипаници, некои симптоми како треска и мускулна болка можат да се олеснат со употреба на парацетамол.
Пронајдете не на следниве мрежи:
©ПУЛС24.MK Вестите на интернет страницата на редакцијата ПУЛС24.MK може да се користат исклучиво за лично информирање. Без писмена дозвола или посебен договор, не е дозволено преземање, користење или реемитување на вестите.
