Кога се зборува за грицки, особено оние што најчесто се консумираат за време на филмови или одмор, многумина ги сметаат за нездрави и непожелни во секојдневната исхрана. Сепак, пуканките се исклучок од ова правило.
Пуканките се меѓу најздравите закуски – богати се со влакна, содржат високо ниво на антиоксиданси, а некои истражувања укажуваат дека можат да помогнат и во борбата против ракот.
Здрава ужина со малку калории
Најздрав избор се пуканките што се подготвуваат „на воздух“, без додадени масти. За разлика од нив, пуканките што се продаваат во кино-салите или оние за микробранова печка често содржат големи количини калории и масти. Истражувањата покажуваат дека средна порција кино-пуканки може да има и до 1.200 калории и околу 60 грама масти.
Повеќе антиоксиданси од некои овошја и зеленчуци
Анализа објавена во 2019 година покажува дека пуканките се богати со полифеноли – соединенија со силно антиоксидативно дејство кои го намалуваат воспалението во организмот. Поради ниската содржина на вода, пуканките имаат дури и поголема концентрација на полифеноли од некои овошја и зеленчуци.
Сепак, експертите предупредуваат дека пуканките не треба да ги заменат овошјето и зеленчукот, бидејќи не ги содржат сите неопходни витамини и хранливи материи.
Полифенолите во пуканките можат да ги блокираат ензимите неопходни за развој на канцерогените клетки и да го регулираат нивното ширење, наведува Американскиот институт за истражување на ракот. Истите соединенија придонесуваат и за намалување на ризикот од кардиоваскуларни заболувања.
Цело зрно богато со влакна и железо
Пуканките се 100 отсто непреработено цело зрно. Една порција може да обезбеди околу 70 проценти од дневните потреби за цели зрна, како и значајна количина влакна потребни за добро варење.
Интересен е и податокот дека пуканките содржат повеќе железо од спанаќот – 0,9 милиграми наспроти 0,8 милиграми во една чаша сиров спанаќ. Иако разликата е мала, таа може да биде значајна, особено за жените, кај кои недостигот на железо е чест проблем.
Со умерена и правилна подготовка, пуканките можат да бидат вкусна и здрава грицка во секојдневната исхрана.
The post Пуканките – една од најздравите грицки што можете да ги јадете appeared first on Во Центар.
