Албанскиот премиер Еди Рама ја критикува политиката на Велика Британија за депортирање на луѓе чии барања за азил се одбиени во трети земји.

Во интервју за „Гардијан“, Рама ја обвини Владата на британскиот премиер Кир Стармер дека бара „места за префрлање мигранти“ со тоа што се залага за „центри за враќање“ во трети земји за сместување на одбиени баратели на азил.

Стармер потврди на самитот во Тирана минатиот месец дека Велика Британија е во разговори со други земји за таков план, но не кажа кои земји.

Рама во тоа време потврди дека Албанија нема да биде дел од шемата.

„Фактот дека ова не само што е замисливо денес, туку и се случува, не е затоа што Кир Стармер или Риши Сунак направиле нешто скандалозно, туку затоа што земјата е во многу мрачна ситуација“, рече тој.

Албанскиот премиер рече дека дискурсот за мигрантите и барателите на азил што моментално се одвива во Велика Британија „би бил неприфатлив“ пред Брегзит.

За време на претходната конзервативна влада во Велика Британија, Лондон и Тирана потпишаа заедничка изјава и формираа работна група за борба против нелегалната миграција, по што повеќе од 1.000 албански граѓани беа вратени во земјата од Велика Британија.

Сепак, односите меѓу двете земји честопати беа затегнати поради реториката на политичарите за тоа како албанските баратели на азил „напаѓаат“ Велика Британија.

За Стармер, Рама рече дека е „многу пристојна и прекрасна личност“.