Русија го зајакнува својот балистички арсенал со нови стратешки ракетни системи, планира да лансира ракети со максимален дострел и може, како одговор на растечките надворешни закани, да го зголеми бројот на тестови, изјави синоќа висок руски командант.

Во јасното предупредување дека Русија ќе одговори доколку почувствува дека нејзината безбедност е загрозена, командантот на руските стратешки ракетни сили, Сергеј Каракаев, рече дека се планирани пробни лансирања на ракети со максимален дострел според новиот тест систем.

„Што се однесува до дострелот, нема место до кое нашите ракети не можат да стигнат“, изјави Каракаев за весникот Краснаја звезда, а пренесува агенцијата РИА. Тој додаде дека Русија би можела да го зголеми интензитетот на напредните ракетни тестирања доколку надворешните закани продолжат да растат.

Тој, исто така, за прв пат јавно потврди дека Русија развива нов интерконтинентален балистички ракетен систем Осина и дека вклучувањето на Осина во борбените операции е приоритет. Каракаев, без да даде детали, откри дека Русија е при крај со развојот на ракетен систем сличен на Орешник, нова суперсонична балистичка ракета со среден дострел.

Русија ја нападна Украина со Орешник во ноември, како одговор на украинското истрелување американски и британски ракети кон Русија. Каракаев посочува дека новата програма за развој на оружје ќе разгледа неколку опции за развој на стратешко офанзивно оружје и ќе ги земе предвид сличните потези на САД по истекот на договорот за ограничување на нуклеарното оружје СТАРТ меѓу двете земји во 2026 година.