Северна Кореја денеска истрела „неидентификувана балистичка ракета“, објави Јужна Кореја, неколку дена откако Пјонгјанг објави дека успешно тестирал мотор на цврсто гориво со цел да развие ново оружје.
„Северна Кореја истрела неидентификувана балистичка ракета кон Источното Море“, што се нарекува и Јапонско Море, соопштија началниците на здружениот генералштаб на Јужна Кореја.
И покрај тешките меѓународни санкции поврзани со неговата програма за оружје, Пјонгјанг изгради арсенал на интерконтинентални балистички ракети (ICBM). Сепак, сите тие се на течно гориво.
Севернокорејскиот лидер Ким Џонг Ун најави дека негов стратешки приоритет е развој на мотори со цврсто гориво за да се изградат понапредни ракети, како моторот тестиран во петокот.
Во 2022 година, Ким Џонг Ун рече дека сака Северна Кореја да ја има најмоќната нуклеарна сила во светот и изјави дека нуклеарниот статус на неговата земја е „неповратен“.
Меѓу неговите цели, кои ги наведе во 2021 година, е и развој на интерконтинентални ракети на цврсто гориво што може да се лансираат од земја или од подморница.
Тестирањето на моторот објавено во петокот е чекор кон реализација на таа цел, но експертите не знаат во која фаза на развој се наоѓа Северна Кореја што се однесува до тие ракети.
Пјонгјанг изврши рекордна серија тестови на оружје оваа година, вклучувајќи ги и најнапредните ракети ICBM.
САД и Јужна Кореја со месеци предупредуваат дека Северна Кореја би можела да биде подготвена да тестира нуклеарно оружје, што ќе биде седма нејзина нуклеарна проба и прва во последните пет години.
Пронајдете не на следниве мрежи:
