Ако во природата на кралското семејство е да испраќа пораки, фотографијата на принцот од Велс во тенк во близина на руската граница е една од најдиректните испратени, јави BBC во петокот.
Принцот Вилијам пристигна во Естонија за да ја поддржи британската војска во она што сега е нејзин најголем оперативен ангажман во странство – одбрана на балтичката држава од руската закана.
Во петокот, на студен и каллив воен полигон, принцот ги обиколи војниците и воената опрема што го штитат источното крило на НАТО алијансата.
Принцот, во маскирна униформа, гледајќи од тенк Челинџер 2, а потоа и оклопно борбено возило, испрати сигнал за британската посветеност да се одбие секоја руска агресија.
За време на неговиот дводневен престој во Естонија, принцот Вилијам посети околу 900 британски војници како дел од овие мултинационални сили.
Принцот беше однесен низ воениот полигон за обука во кампот Тапа, кој е дел од операцијата Кабрит, придонесот на Велика Британија за „колективната безбедност и одбрана“ на НАТО во овој ранлив балтички регион.
На принцот, кој имаше значка на НАТО на униформата, му беше покажана теренската обука на борбената група, а се сретна и со естонските и француските војници.
