Околу 16 часот попладнево, силно невреме со пороен дожд и град ги погоди Охрид и околината. Според првичните информации кои ги споделуваат граѓаните на социјалните мрежи, градот бил крупен и предизвикал штета на автомобили во градот.

По релативно кусото, но силно невреме, повеќето улици во Охрид се претворени во реки, а сообраќајот се одвива тешко.

Според Управата за хидрометеоролошки работи (УХМР), невремето било резултат на силна конвективна облачност која се формирала над западниот дел од земјата. Метеоролозите најавуваат дека и утре ќе има можност за нестабилност, особено во попладневните часови.

Од Центарот за управување со кризи (ЦУК) апелираат до граѓаните да бидат внимателни и да ги следат препораките на надлежните институции.