Етничките Срби во Митровица, дел од четирите општини со мнозинско српско потекло, кои го сочинуваат северниот дел на Косово, излегоа на демонстрации поради апсењето на четирите момчиња поради наводно навреда на полицаец.

Портпаролот на косовската полиција изјави дека во понеделникот по полноќ неколку млади Срби, наводно, вербално нападнале двајца полицајци и физички се пресметале со нив на улица во Митровица, при што полесно повредиле еден од полициските службеници.

Момчињата потоа побегнале од местото на настанот, но на крајот биле фатени од полицијата.

Десетици Срби се собраа пред седиштето на полицијата во северна Митровица, извикувајќи пораки за ослободување на нивните деца.

„Мојот син беше киднапиран на улица пред две ноќи од некои цивили, откако им беше кажано да не пеат на улица. Тогаш не беа познати нивните имиња. Но потоа се покажа дека биле инспектори во цивилна облека. Дознавме дека воопшто не се претставиле. Не беа во униформа. Немаа лични идентификации. И ни ги зедоа децата“, раскажа еден граѓанин кој присуствуваше на протестот.

Тие се пожалија и на полициска бруталност.

Косовската полиција негираше дека употребила сила.