Министерството за внатрешни работи поднесе кривична пријава против член на обезбедувањето на премиерот Христијан Мицкоски под сомнење за трговија со податоци и уцена со тие информации, дознава „Нетпрес“. Обвинетиот е Ангел Самараков од Велес. При претресот во неговиот дом, полицијата откри дека поседува дополнителни службени материјали. Тој е уапсен и ќе биде изнесен пред истражен судија во текот на денот, известува инфомах.мк. Овој службеник, кој веќе бил пријавуван кај внатрешната контрола и деградиран, се жалел и до Државната комисија за спречување дискриминација. До април 2024 година, тој работел како виш инспектор за имотни деликти во СВР Велес, но подоцна станал инспектор за крим техника. По доаѓањето на власт на ВМРО-ДПМНЕ, тој бил унапреден во лично обезбедување на премиерот Мицкоски. Дополнително, Самараков е активен член на Синдикатот на полицијата и често присуствува на средби со пратеници од владејачката партија ВМРО-ДПМНЕ.
Министерството за внатрешни работи попладнево објави за апсењето на обезбедувачот, откако информацијата излезе на порталите. На 30.03.2025, полиција спроведе акција за претрес во Велес, врз основа на сомнеж за оддавање службена тајна според член 360 од Кривичниот законик. На паркингот пред хотел во Велес, во возило “бмв” беа најдени А.С. и Б.К., со ранец полн со службени материјали. Дополнително, конфискувана е и електроника, службени документи и други релевантни предмети за истрагата. Службеникот, според преземените мерки, незаконски поседувал и откривал доверливи информации. Поднесена е кривична пријава кон А.С. за оддавање службена тајна.
The post Уапсен член на обезбедувањето на Мицкоски за злоупотреба на доверливи документи. appeared first on 365.mk.
