Речиси двомесечниот карантин, со забраната за движење на граѓаните, во комбинација со рекордно високите температури и топлото време, ги наполнија плажите во Грција, кои наликуваат како да е средина на август, а не средина на мај.
Од рано утрово, на голем дел од организираните плажи во Атина, има редици за влез, додека пак до пладне некои беа веќе преполни.
Во текот на вчерашниот, прв ден од отворањето целосно се почитуваат сите правила и прописи, како од сопствениците и менаџерите на плажите, така и од посетителите, а тоа, вчера го констатираа и министерот и заменик-министерот за развој на Грција при нивната посета на една од плажите во близина на Атина.
Адонис Георгиадис и Никос Папатанасис рекоа дека „се е под конец“ и им се заблагодарија на граѓаните за дисциплината и придржувањето кон мерките.
Сепак поради коронавирусот, жителите на неколку градови особено од Атина се пожалија поради високите цени на услугите на плажите поради вирусот.
Имено за две лежалки и чадор на плажа тие одвоиле дури 80 евра.
Оваа цена сопствениците на лежалките ја правдаат поради тоа што секој пат кога ќе се ослободат тие мора веднаш да се дезинфицираат за да можат да дојдат следните корисници.
Покрај ова персоналот носи маски, а социјалното растојание исто така се почитува.
