Русија во вторникот зборуваше за нови успеси во источна Украина, велејќи дека упадот на Украина на руска територија не успеал да ја одврати Москва да започне офанзива во регионот на Донбас, пренесува Ројтерс.

РИА го цитираше секретарот на Советот за безбедност на Русија, Сергеј Шојгу, кој рече дека упадот на Украина во руската област Курск, кој започна на 6 август, има за цел да ја подобри преговарачката позиција на Киев и да ги пренасочи руските сили во Донбас.

„Но, имаме доволно сили, ја продолжуваме нашата офанзива“, рече тој.

Руските новински агенции го цитираат Министерството за одбрана дека московските сили зазеле уште четири села во источна Украина.

Шојгу рече дека руските сили го зголемуваат темпото на нивната офанзива, заземајќи речиси 1.000 квадратни километри во период од осум дена во август и септември.

Во последните недели руската армија напредува низ регионот на Доњецк во правец на Покровск, кој е стратешки логистички центар за Украина.

Русија во понеделникот објави дека нејзините сили го зазеле селото Мемрик, околу 24 километри југоисточно од Покровск.

Руските воени сили ги зазедоа и Краснохоривка, Григоровка, Галициновка и Водјаное во областа Доњецк.