Илон Маск, извршниот директор на Tesla и SpaceX, повторно предизвика контроверзии откако го смени своето корисничко име на платформата X (порано Twitter) во „Kekius Maximus“ и објави нова профилна слика со жабата Пепе во римска облека.

Овој потег, карактеристичен за неговиот непредвидлив стил, предизвика лавина реакции кај неговите 210 милиони следбеници, но и шпекулации за значењето на неговиот избор.

Новиот прекар е комбинација од името на римскиот генерал од филмот „Гладијатор“, Максимус Децимус Меридиус и зборот „кек“, популарен меѓу интернет троловите и алтернативната десница како синоним за „LOL“. Првично безопасен лик од стрипови, жабата Пепе се поврзува со контроверзни групи со текот на годините и е означен како симбол на омраза од страна на Американската лига за борба против клеветата.

Маск не даде никакво објаснување за потегот, но промената предизвика значителен скок на вредноста на мемекоинот Kekius Maximus, кој скокна над 900%. Критичарите се загрижени дека промената на името и аватарот на Маск може да претставува флерт со групи кои промовираат омраза, додека други шпекулираат дека тоа е шега, маркетинг или обид да се манипулира со крипто-пазарите.

Маск претходно објави пост на платформата поврзана со видео играта „Path of Exile 2“, што можеби е дел од поширок контекст. Неговата активност на X често предизвикуваше бурни реакции, како за хумористични објави, така и за обвинувањата за ширење дезинформации откако ја купи платформата за 44 милијарди долари во 2022 година.

Покрај неговите контроверзни онлајн активности, Маск стана советник на новоизбраниот американски претседател Доналд Трамп и доби задача да го води новиот Оддел за владина ефикасност (DOGE), кој ќе работи на намалување на владините трошоци. Инаку, „doge“ е и име за меме со куче, што е и заштитно лице на „dogecoin“, уште една криптовалута.