Јавен повик на професорите – Гордана Силјановска кандидат за претседател на Македонија

Јавен повик со барање јавноста да застане зад кандидатурата на универзитетската професорка Гордана Силјановска-Давкова за претседателка на Република Македонија упатија триесетина македонски професори. Како што велат тие, потребно е да се наметне обединување зад личност која се издигнува над ситните меѓупартиски и меѓуетнички ривалитети, а таква според нив е токму професорката на  Силјановска-Давкова.
Повикот од професорите до јавноста ви го пренесуваме во целост:
– Како никогаш порано, во најтешките моменти на поновата национална и политичка историја, на Македонија ѝ е итно потребен здружен опозициски блок, кој ќе ги обедини сите граѓански и интелектуални капацитети. Со оглед на состојбата, ова ќе биде работа на повеќе генерации, но првиот предизвик со кој треба да се соочиме на политички план се претседателските избори. Станува збор за навидум помалку важна институција во парламентарен систем, но историскиот миг ја прави повеќе од значајна. Во услови на нарушени контролни механизми, дерогација на поделбата на власта и на системот на „кочници и рамнотежа“, во ситуација кога ставот на граѓаните изразен на референдум беше безобразно заобиколен, институцијата Претседател на Републиката е последниот, или поточно првиот, браник на уставните вредности.
Ова не е време за нормален политички натпревар, особено поради основаните сомнежи дека власта не е подготвена да организира фер и чесни избори. Затоа, како единствена рационална алтернатива се наметнува обединувањето зад личност, зад кандидат кој со сиот свој животен и академски хабитус, морал и интегритет, се издигнал над ситните меѓупартиски и меѓуетнички ривалитети.
Таква надпартиска личност е професорката на Правниот факултет во Скопје, Гордана Силјановска-Давкова. Во нејзината личност и јавно дејствување се препознаваме без оглед на политичка, верска, етничка или социјална припадност.
Свесни дека учеството во политички натпревар во вакви околности бара голема саможртва, особено при окториран устав и изменето име, ние, долупотпишаните, јавно ја повикуваме Гордана Силјановска-Давкова да размисли за можноста да се појави како кандидат на претстојните избори.
Се надеваме овој апел ќе стаса и до најголемата опозициска партија во Собранието, со цел да создаде поширока општествена синергија и да застане зад нашиот предлог. Во овој момент ни е потребен претседател кој нема да спроведува нечија партиска политика, туку ќе биде гласот на разумот, правото, Уставот и совест на граѓаните.
За првпат во политичката историја на Македонија имате можност да поддржите личност, на која ќе ѝ верувате дека ќе биде гласен коректор и морален авторитет во петгодишен период на тешки искушенија за земјата и дома и на меѓународен план.
Доколку ја испуштиме оваа шанса да излеземе сплотени околу една исклучителна личност, ова можат да бидат и последните непосредни избори за претседател на Републиката.
Не се сомневаме дека во случај на неуспешни избори, владејачката коалиција ќе пристапи кон уште една уставна измена со која ќе ни го одземе правото непосредно да одлучуваме за наш граѓански претставник на позицијата шеф на државата, а партократијата ќе се всели во уште една државна институција.
Веруваме дека проф. Силјановска-Давкова може да внесе разум, знаење и морал на политичката сцена, и дека ќе ги обедини македонските граѓани на кои суштествено им е потребен заеднички глас во полза на владеење на правото и здравиот разум, пишуваат универзитетските професори, наведено е во повикот на професорите.
Потписници наповикот се:
1. Катица Ќулафкова, академик
2. Наде Проева, професор
3. Каролина Ристовска-Астеруд, професор
4. Фредерика Поповска-Павловска, професор
5. Билјана Ванковска, професор
6. Жидас Даскаловски, професор
7. Елка Јачева Улчар, професор
8. Михајло Миноски, професор
9. Никола Павловски, професор
10. Богдан Богданов, професор
11. Снежана Филипова, професор
12. Костадин Тренчевски, професор
13. Ивица Милевски, професор
14. Јован Донев, професор
15. Велика Стојкова Серафимовска, професор
16. Валериј Софрониевски, професор
17. Јани Бојаџи, режисер
18. Ружица Манојловиќ, професор
19. Игор Улчар, професор
20. Константин Миноски, професор
21. Марија Ристевска, доцент
22. Драги Митревски, професор
23. Тихомир Стојановски, професор
24. Благоја Јанаков, професор
25. Петре Георгиевски, професор
26. Јане Богданов, професор
27. Виктор Ѓамовски, професор

Пронајдете не на следниве мрежи:©ПУЛС24.МК Вестите на интернет страницата на редакцијата ПУЛС24.МК може да се користат исклучиво за лично информирање. Без писмена дозвола од ПУЛС24.МК или посебен договор, не е дозволено преземање, користење или реемитување на вестите.