Едноставно Македонија… Шефот на инспекторите во Битола си изградил дивоградба, никој од Општината не реагира?

Главниот инспектор во Општина Битола, Кирил Мицевски, си изградил дивоградба која ја изнајмува за приватни забави, реагираат битолчани. Локалното население до редакцијата на Инфомакс испрати и фотографии од објектот на Мицевски за кој сметаат дека е дивоградба.

Мицевски во инспекторатот во Битола ја има преживеано секоја влада и речиси 14 години фигурира како инспектор во Општина Битола. Накратко, доколку се покаже дека објектот е неделагелн, излегува дека токму оној кој треба да го спречи дивеењето на дивоградбите, самиот има изградено нелегален објект со базен на земјиште кое во Агенцијата за катастар на недвижности се уште е заведено како нива со помошни објекти фарми.

Од јавно достапните податоци во Агенцијата за катастар на недвижности може да се забележи дека на имотниот лист постои само „придружен објект – фарми“, не и било каков објект за домување или други намени.

Од документот во продолжение можете да видите дека ова е состојба на ден 31.03.2025 година, имотниот лист гласи на име на Мицевски Кирил, а на парцелата има нива помошни објекти.

Сепак, податоците кои се достапни на Агенцијата за катастар на недвижности не соодветствуваат со реалноста.

Од фотографиите во продолжение можете да видите дека на истата парцела нема помошен објект фарма, како што е официјално заведено во катастар, туку има цел објект со базен кој воопшто не личи на фарма.

Се поставува прашањето дали главниот општински инспектор си изградил нелегален објект, без одобрение за градба, за кој не плаќа соодветни давачки кон општината и државата, а никој од неговите колеги не смее да реагира?

Дополнително проблематични се информациите од битолчани дека во нелегалниот објект се организираат забави, односно истиот се изнајмува за приватни забави. Доколку ваквите информации се точни, а дали се точни би требало да проверат надлежните органи, главниот општински инспектор во Битола сторил низа кривични дела, градел без одобрение за градба, не плаќа соодветни даноци кон општината и државата и доколку продитира од објектот, како истиот може да работи без фискална смета?

Членот 244-а, бесправно градење, предвидува дека:

(1) Тој што гради или изведува градба или врши надзор над градба на сопствено или туѓо земјиште без одобрение за градење или спротивно на одобрението за градење издадено од надлежен орган, ќе се казни со затвор од три до осум години.
(2) Ако делото од овој член е сторено заради продажба, ќе се казни со затвор најмалку четири години.
(3) Со казната од став 2 ќе се казни и тој што изведува градежни работи спротивно на основниот проект или врши реконструкција на конструктивните елементи на градбата без основен проект и ја нарушува механичката отпорност, стабилноста на градбата и сеизмичката заштита.

Членот 279, Даночно затајување, предвидува дека:

(1) Тој што со намера самиот или некој друг да одбегне целосно или делумно плаќање данок, придонес или некоја друга давачка на која е обврзан со закон, дава лажни податоци за своите приходи или за приходите на правното лице, предметите или другите факти од влијание за утврдувањс на износот на ваквите обврски или тој што со иста намера во случај на задолжителна пријава не пријави приход, односно предмет или друг факт од влијание за утврдување на ваквите обврски, а износот на обврската е од поголема вредност, ќе се казни со затвор од шест месеци до
пет години и со парична казна.
(2) Ако износот на обврската од став 1 е значителен, сторителот ќе се казни со затвор од најмалку четири години и со парична казна.

Сето ова би можело да значи и залоупотреба на службената положба и овластување доколку Мицевски со својата позиција влијаел да не се изврши контрола на објектот, или доколку поради неговото влијание не било постапувано соодветно. Несовесно работење во службата, измама во службата, проневера во службата, како и примање и давање поткуп се кривичните дела со кои и шефот на инспекторите во Битола, но и самите инспектори би можеле да се соочат доколку се утврди дека се работи за бесправно изграден објект.

Останува да видиме дали општинските инспектори, колеги на Мицевски ќе проверат дали нивниот шеф си изградил цела вила на простор на кој наводно има „помошен објект – фарма“? Дали МВР и УЈП, како и ОЈО Битола ќе почнат постапка за претходно наведените кривични дела и останатите прекршувања на Законот?