Државните институции и претпријатија пливаат во долгови. Во првите три месеци од годинава имаат достасани, а ненаплатени обрски од речиси 652 милиони евра. Должат речиси сите. На листата на Министерството за финансии се 1.279 институции – државни и јавни претпријатија, здравствени институции, комунални претпријатија, министерства, општини. Дури 142 милиони евра од вкупните долгови на сите, се за режиски трошоци – сметки за струја, вода, парно и останато. А се должат и плати и надоместоци за вработени, пишува ТВ21.
Долгови на институции прв квартал 2025
- Вкупно: 651,8 милиони евра
Долговите пораснале за 25,5 милиони евра во однос на последниот квартал од 2024. Тогаш вкупнот долг на 1.255 институции бил 626 милиони евра.
Долгови на институции 4 квартал 2024
- Вкупно: 626 милиони евра
Но, загрижува податокот дека за една година, институциите успеале да го пораснат долгот за 161 милион евра. Во првиот квартал од 2024 долгот на 1.306 институции изнесувал 490,7 милиони евра.
Долгови на институции 1 квартал 2024
- Вкупно: 490,7 милиони евра
Првите пет најголеми должници се државните енергетски претпријатија, како и железниците. Номагас има 88,4 милиони евра долг, Елем над 59, а ЕСМ дистрибуција на топлина 33,8 милиони евра. Ако се собере пак долгот на двете претпријатија на железницата тој изнесува околу 135 милиони евра.
5 НАЈГОЛЕМИ ДОЛЖНИЦИ ВО ПРВ КВАРТАЛ 2025
- НОМАГАС АД СКОПЈЕ 88,4 милиони евра
- АД МЖ ТРАНСПОРТ 74,6 милиони евра
- ЕЛЕМ 59,1 милиони евра
- ЈП МЖ ИНФРАСТРУКТУРА 60 милиони евра
- ЕСМ ДИСТРИБУЦИЈА НА ТОПЛИНА 33,8 милиони евра
Должи и Службата за општи и заеднички работи на Владата, 1,7 милиони евра. А долгот на Јавните установи од областа на здравството, за потребите на универзитетските клиники, завод и ургентен центар е 25,5 милиони евра.
Најголеми долгови меѓу општините имаат Гостивар со 11,5 милини евра и Тетово со 9,7 милиони евра.
ОПШТИНИ СО НАЈГОЛЕМИ ДОЛГОВИ ПРВ КВАРТАЛ 2025
- ГОСТИВАР 11,5 милиони евра
- ТЕТОВО 9,7 милини евра
- ГРАД СКОПЈЕ 5,2 милиони евра
- КАВАДАРЦИ 3,2 милиони евра
- ДЕЛЧЕВО 3,1 милион евра
Од министерствата на врвот е здравство, со долг од 1,85 милиони евра.
МИНИСТЕРСТВА СО НАЈГОЛЕМИ ДОЛГОВИ ПРВ КВАРТАЛ 2025
- МИНИСТЕРСТВО ЗА ЗДРАВСТВО 1,85 милиони евра
- МИНИСТЕРСТВО ЗА КУЛТУРА И ТУРИЗАМ 863.000 евра
- МИНИСТЕРСТВО ЗА ОДБРАНА 734.000 евра
Од вкупниот долг од речиси 652 милиони евра, државните институции и претпријатија најмногу доспеани, а ненаплатени обврски имаат кон јавниот сектор речиси 370 милиони евра. А долгот кон приватниот сектор достигна 241 милион евра.
Извор: TV 21
