Бугарија пред Европската унија тешко ќе може да ги објасни своите позиции поврзани со Македонија, бидејќи во нив се кријат имплицитни територијални и етнички претензии, анализара за Макфакс поранешниот министер за надворешни работи Слободан Чашуле.

Предлага, во духот на потребата за унапредување на македонско-бугарските односи, претседателот Росен Плевнелиев и премиерот Бојко Борисов да ја посетат земјата и пред Музејот на холокаустот во Скопје и во селото Ваташа да се извинат за злосторствата на територијата на Македонија за време на фашистичката окупација.

„Јас уште на времето предупредував дека на грчките блокади ќе се придружат и бугарски, и тоа не ме изненадува. Тој тренд се гледа од поодамна, со тоа што бугарската блокада многу потешко бугарската држава ќе ја артикулира, бидејќи за разлика од грчкиот проблем со нашето име, овде се кријат имплицитни претензии, како територијални, така и етнички. Такво нешто е тешко прифатливо за Европската унија, особено кога Бугарите, на еден, според мене, чуден и по малку невешт начин сакаат оваа своја позиција да ја претстават како протест против фашизмот што го имале за време на Втората светска војна, што за Европа е апсурдно и апсолутно неприфатливо. Во врска со тезите на премиерот Бојко Борисов дека Германија повеќе не го отвара тоа прашање на фашизмот, а зошто сега ние го отвараме, треба да се потсети господинот премиер, со сета почит, дека Вили Брант отиде во Аушвиц и се извини од името на германската нација кон Евреите.

Така што можам слободно да кажам дека претседателот Плевнелиев, заедно со премиерот Борисов се добредојдени во Македонија пред Музејот и споменот на холокаустот да се извинат и потоа да појдат до Ваташа и да се извинат за тој злостор, еден од многуте, кон македонскиот народ за време на фашистичката окупација. Тогаш ќе можеме да зборуваме за европска Бугарија со која ќе се потрудиме да славиме празници заедно, да ја проучуваме историјата, да ги разграничуваме деталите, од посебното да направиме заедничко и обратно. Сé друго е само ирационална позиција која нема да мине во Европската унија“, вели Чашуле за Макфакс.

Во заканите од официјална Софија не препознава реална основа, туку, како што вели, игра за домашна употреба.

„Како тоа ќе дадат вето затоа што Македонија дала филм за фашизмот, фашистичката окупација и погромот? Како ќе дадат вето за Македонија дека ја крадела бугарската историја? Прво, крадењето историја треба да го дефинираат, и второ, ние во ниту еден момент не порекнуваме дека во рамките на Османлиската империја сме биле заедно, во рамките на Византиското царство сме биле заедно, сме имале држави што биле и заеднички и посебни.

И конечно, како ќе објасниме на Европа дека над 1000 години пред Француската револуција на овој простор имало нации кои биле бугарски. Нацијата е феномен на буржуаската држава и секакво трагање по постоење на нација во минатото, како што тие прават за да нé оспорат нас, е безмалку смешно. И тоа нема да помине во Брисел. Но, ова е добра игра за домашна бугарска употреба“, анализира Чашуле за Макфакс.

Преземено од Макфакс (https://www.makfax.com.mk/)