Случај од Уганда докажува дека медицината секојдневно напредува. Имено, 70-годишната Сафина Намукуаја роди близнаци.
„Тоа е извонреден подвиг“, рече нејзиниот лекар, д-р Едвард Тамале Сали кој ја следел бременоста и породувањето со царски рез во болницата за асистирано оплодување.
Раѓањето на своите близнаци, момче и девојче, Сафина го нарече вистинско „чудо“.
<
„Мајката и децата се во добра здравствена состојба и се набљудувани во болница во Кампала“, рече д-р Тамале. Кампала е главниот град на Уганда.
Сафина живее во селото Масака, кое е 120 километри западно од главниот град, а своето прво дете, девојче го родила пред три години. Таа немала деца со нејзиниот прв сопруг, кој починал во 1992 година, и затоа била етикетирана како „проколната“.
Вториот сопруг го запознала во 1996 година, но тој не присуствувал на породувањето и всушност исчезнал кога дознал дека носи близнаци.
„Откако ме примија овде, тој не се појави“, рече таа. Не е објавено дали бременоста е постигната преку донирана јајце клетка или Намукуаја ги замрзнала сопствените јајце клетки додека била во репродуктивна возраст. Во секој случај, оплодувањето е направено со инвитро.
