Снегот стана секојдневие, па помисливме дека е добра идеја да ви пренесеме неколку совети за возење на снег. Покрај советите дадени подолу, има уште многу работи на кои треба да внимавате. 

Се надеваме дека советите кои ќе ви ги дадеме ќе ви го олеснат возењето на снежни и замрзнати улици.

1.Намалете ја брзината на движење и оставете доволно растојание меѓу вас и автомобилот пред вас за да можете навреме да закочите. Како генерално правило, оставете трипати повеќе простор од вообичаено.

2.Кочете нежно и внимателно за да избегнете блокирање на тркалата и да ја намалите шансата за лизгање. Ако тркалата сепак се блокираат, отпуштете ја кочницата и повторно притиснете ја.

3.Вклучете ги вашите светла за полесно да бидете видени и подобро да гледате пред вас.

4.Во снежни и замрзнати услови можете да користите еден повисок степен на пренос од вообичаено, за да го намалите пролизгувањето на погонските тркала.

5.Внимавајте на мостови, надвозници и подвозници, и секаде каде што допира помалку сончева светлина. Овие делови од патот можат да бидат подмрзнати и ако нема снег.

6.Ако возилото почне да пролизгува, отпуштете ја педалата за гас и дозволете возилото да се смири.

7.Избегнувајте нагли движења со управувачот и нагли притискања на педалите за гас и кочници.

Ако се заглавите во снег:

1.Не ги лизгајте погонските тркала непотребно, така само ќе се заглавите повеќе.

2.Нежно притискајте на гаста, за автомобилот полека да излезе од снегот.

3.Користете лопата за снег за да го отстраните снегот околу автомобилот.

4.Ако треба, занишајте го возилото напред-назад за да почне да се движи.5.

Повикајте некој да ви помогне да го турнете и да го придвижите возилото.

Генерални совети:

Опремете го вашето возило со соодветните зимски пневматици и зимска опрема.

Темелно исчистете го снегот од сите стаклени површини на вашиот автомобил, како и од предните и задните светла. Најдобро е ако можете снегот да го исчистите од целиот автомобил.

Проверете ги и сменете ги метличките на бришачите на ветробранското стакло.

Користете течност за чистење на ветробранското стакло која не замрзнува.

Проверете го притисокот во гумите.

Ако патувате некаде, понесете топла облека и некоја топла покривка. Може да се случи сообраќајот да е блокиран па да треба да преноќите во вашиот автомобил.

Внимавајте на подмрзнати делови на улиците.

Запомнете, иако зимските гуми нудат подобра тракција на снег и во снежни услови, сепак тие не се целосно решение и не ја нудат истата стабилност како летните гуми во лето. Истото важи и за автомобилите со погон на сите четири тркала – немојте да мислите дека ако вашето возило има ваков погон дека сте целосно безбедни на снегот! Внимавајте, обрнете внимание на условите околу вас и возете внимателно!