Се проценува дека Авганистан лежи на неискористени ресурси вредни над 1 билион долари, што го привлече интересот на некои странски инвеститори
Привремената авганистанска талибанска Влада потпиша 25-годишен договор со кинеска компанија за црпење нафта од сливот на реката Аму во Авганистан и за унапредување на нафтените резерви во северниот дел на земјата.
Првиот голем договор за странски инвестиции откако Талибанците ја презедоа власта во Кабул во 2021 година, е потпишан вчера од вршителот на должноста министер за рудници и нафта, шеикот Шахабудин Делавар и официјален претставник на нафтената и компанијата за гас на Централна Азија „Ксинџијанг“ на церемонија одржана во главниот град Кабул.
Вршителот на должноста вицепремиер Мула Абдул Гани Барадар Ахунд и кинескиот амбасадор во Авганистан, Ванг Ју, исто така присуствуваа на церемонијата на потпишување.
„Неодамна, од Економската комисија беа одобрени неколку проекти, по што ќе бидат преземени фундаментални чекори за просперитетот на земјата и за нејзината благосостојба“, изјави Барадар за државната Новинска агенција „Бахтар“.
„Бараме компанијата да ја продолжи процедурата во согласност со меѓународните стандарди и во најдобар интерес на жителите на Сар-е Пул [северна провинција во Авганистан]“, додаде тој.
По тој повод, шеикот Шахабудин Делавар истакна дека според договорот, кинеската компанија ќе црпи нафта од област со површина од 4.500 квадратни километри колективно во северните провинции Сар-е-Пул, Џавзџан и Фарјаб.
„Во рамките на проектот ќе бидат вработени над 3.000 локални жители“, рече тој.
Делавар истакна дека првично дневно ќе се вадат 200 тони нафта, а количеството постепено ќе се зголемува на 1.000 тони дневно.
Кинескиот претставник договорот го окарактеризира како важен за економскиот раст на земјата разурната од војна и како позитивен чекор кон блиски односи меѓу Кабул и Пекинг.
Според договорот, кинеската компанија ќе инвестира 150 милиони долари во првата година, а инвестицијата ќе се зголеми на 540 милиони долари за три години.
„Се проценува дека Авганистан лежи на неискористени ресурси вредни над 1 билион долари, што го привлече интересот на некои странски инвеститори“, пишува Новинската агенција „Бахтар“.
