До сега нема никакви информации за интерпелацијата за работата на собранискиот спикер, поднесена од Левица. Дали материјалот е пристигнат до пратениците, кога ќе биде ставена на дневен ред, се уште не се знае, иако со Деловник е предвидено интерпелацијата да се стави на првата наредна седница, 15 дена откако материјалот ќе им биде доделен на пратениците.

Инцидентот на скопскиот аеродром, во кој телохранителот на Гаши си заработи кривична пријава, отвори терен за политички препукувања. СДСМ постапувањето на Гаши го оценува спротивно на законот, а за премиерот Христијан Мицкоски од партијата велат дека клекнал пред претседателот на Собранието.

„Мицкоски коленичи пред Гаши и ова е жално за гледање. Ниту СДСМ ниту било кој друг не напиша јасно во полицискиот извештај дека е издадена „незаконска наредба од странана Претседателот на Собранието. Го повикуваме Мицкоски да е одважи и да го смени Гаши. Само така ќе го докаже својот збор дека ќе има одговорност и за политичарите“, велат од СДСМ.

Од коалицијата ВЛЕН велат дека Левица како „продолжена рака“ на ДУИ и СДСМ ја покренала интерпелацијата за тестирање на стабилноста на мнозинството.

„Целта секако не е да се заштитат дипломатските односи со Косово или Охридскиот договор. Целта е да се предизвика политички земјотрес. Зошто? Да се тестира владиното мнозинство и да се види дали опозицијата може да најде заеднички интерес да дејствува заедно“, велат од ВЛЕН.