Инфлацијата во еврозоната порасна во декември, како и цените на енергијата, покажаа официјалните податоци, кои според експертите најверојатно ќе ја поттикнат Европската централна банка (ЕЦБ) повнимателно да продолжи со циклусот на намалување на каматните стапки.

Потрошувачките цени се зголемија за дури 2,4 отсто минатиот месец, како што прогнозираа аналитичарите на Блумберг и фирмата за финансиски податоци FactSet, во однос на 2,2 отсто во ноември.

Базичната инфлација – која ги исклучува нестабилните цени на енергијата, храната, алкохолот и тутунот и е клучен показател за ЕЦБ – беше 2,7 проценти.

ЕЦБ се уште се очекува да ги намали каматните стапки на следниот состанок за монетарната политика на 30 јануари, но со ценовните притисоци кои сè уште се присутни во еврозоната, ќе мора внимателно да чекори, и покрај знаците на економска слабост, велат аналитичарите.

Намалување на каматните стапки

„Очекуваме ЕЦБ да ги намали стапките само еднаш во првата половина од оваа година, со дополнителни намалувања концентрирани во втората половина на 2025 година“, рече Чарли Корнс, виш економист во британскиот Центар за економски и деловни истражувања.

Декемвриското зголемување доаѓа откако инфлацијата во 20-те земји на единствената валута во септември падна на најниско ниво во последните три години од 1,7 отсто. Оттогаш, потрошувачките цени полека се враќаат над целта на ЕЦБ од два проценти, што беше точната бројка во октомври.

Повисокото читање се должи на зголемувањето на цените на енергијата од 0,1 отсто во декември, што е значително зголемување по падот од два отсто во ноември.

Последните податоци покажаа дека цените на храната и алкохолот биле стабилни на 2,7 отсто минатиот месец, додека инфлацијата во услужниот сектор минатиот месец пораснала за четири отсто, што е малку повеќе од 3,9 отсто во ноември, пренесува АФП.