Вкупно 18 милиони 671 илјада 591 денар патни трошоци им се исплатени на пратениците од Собранието на Република Македонија за 2024 година, дознава Инфомакс.

Според податоците кои ги добивме од Собранието, пратениците потрошиле повеќе од 303,6 илјади евра за патни трошоци, што е околу 900.000 денари помалку во споредба со 2023 година, меѓутоа рекордерите се со речиси исти суми.

Да почнеме од „топ 10“ пратеници со најмногу патни трошоци.

Прв на листата е Петар Ристески од Прилеп, пратеник од пратеничката група на ВМРО-ДПМНЕ, кој за една година земал неверојатни 868.650 денари за патни трошоци. Повратен автобуски билет на релација Прилеп-Скопје е околу 900 денари, па пратеникот би можел да размисли да го смени начинот на патување со што ќе потроши помалку народни пари, а и ќе може почесто да се гледа со народот кој му ги плаќа патните трошоци.

Втор на листата е Мирче Аџиоски од Струга, исто така од редовите на ВМРО-ДПМНЕ, кој потрошил 756.788 денари, потоа следуваат Дајанчо Ефтимов од Струмица, пратеник од ВМРО-ДПМНЕ кој земал 606.424 денари. Само за споредба, рекордерката од минатата година, Јадранка Поцкова имаше патни трошоци од 676.414 денари. Пратеничкиот стандард очигледно расте штом минатогодинешната рекордерка сега би била на трето место по патни трошоци.

Следни на листата се Зоранчо Јованчев со 500.419 денари (Кавадарци, ВМРО-ДПМНЕ), Миле Талевски со 470.205 денари (Прилеп, СДСМ), Ангелинка Петкова со 447.730 денари (Гевгелија, ВМРО-ДПМНЕ), Миле Лефков со 437.386 денари (Кочани, ВМРО-ДПМНЕ), Олга Лозановска со 402.986 денари (Битола, ВМРО-ДПМНЕ), Никола Мицевски со 392.425 денари (Штип, ВМРО-ДПМНЕ) и последна од топ 10 е Арбана Пашоли со 378.083 денари (Дебар, ДУИ).

Рекордерите нѐ чинеле вкупно 5 МИЛИОНИ 261 ИЛЈАДИ 96 ДЕНАРИ.

Но, тоа не е сѐ. Две од рекордерките имаат изнајмено и станови во Скопје. Олга Лозановска покрај тоа што земала патни трошоци има изнајмено и стан за кој Собранието ѝ плаќа месечна закупнина од 400 евра, а истата во анкетниот лист доставен до ДКСК пријавила стан во сопственост на брачен другар во општина Центар.

Ангелинка Петкова покрај тоа што има земено патни трошоци има и изнајмен стан за кој Собранието ѝ плаќа месечна закупнина од 400 евра.

Во продолжение листа од сите пратеници кои земале патни трошоци, во листата има и поранешни пратеници, односно членови на претходниот состав на Собранието:

18,5 милиони денари фрлени во ветер… Но, нормално дека тоа не е сѐ. Дел од пратениците имаат изнајмено станови во Скопје, во кои престојуваат, а месечната закупнина им ја плаќа Собранието, односно ние, граѓаните.

Такви се пратениците:

Даниела Христова, 400 евра месечно или 4,800 евра годишно. Христова зема и патни трошоци.

Марија Костадинова. 20,300 денари месечно или 101.500 илјади денари за петте месеци за кои бил изнајмен станот, истата земала и патни трошоци.

Емилја Рамбабова, 380 евра месечно, или 1520 евра за четирите месеци за кои бил изнајмен станот, истата земала и патни трошоци.

Јован Јаулески, во периодот од јануари до мај 2024 година по 330 евра месечно, во периодот од јуни до декември 2024 година 350 евра месечно или вкупно 4100 евра.

Бети Рабаџиевска Наумовска, 350 евра месечно или 1750 евра за петте месеци. Истата зема и патни трошоци.

Лидија Петкоска во периодот од јануари до мај 2024 година, 355 евра месечно, а во периодот од јуни до декемри 2024 година по 400 евра месечно или вкупно 4575 евра. Истата зема и патни трошоци.

Грација Бакраческа 400 евра месечно, или 4.800 евра вкупно. Пратеничката зема и патни трошоци.

Соња Михаиловска, 350 евра месечно, или 2100 евра вкупно, а зема и патни трошоци.

Лолита Ристова, 385 евра месечно, или 1925 евра, земала и патни трошоци.

Стојан Миланов, 400 евра месечно, вкупно 800 евра.

Марија Кочовска, 24.000 денари месечно или 120.000 денари вкупно, земала и патни трошоци.

Олга Лозановска, 400 евра месечно или вкупно 2800 евра, истата е меѓу рекордерите за земени патни трошоци.

Јованка Тренчевска, 400 евра месечно или вкупно 2800 евра, земала и патни трошоци.

Ангелинка Петкова, 400 евра месечно или 2800 евра вкупно, истата е меѓу рекордерите за земени патни трошоци.

Моника Трајанова, 400 евра месечно или вкупно 1600 евра, земала и патни трошоци.

Миле Цеков, 400 евра месечно, вкупно 2800 евра.

Пратениците на кои им се плаќа стан во 2024 година чинеле вкупно 42,7 ИЛЈАДИ ЕВРА, или 2 милиони и 630 илјади денари!

Вкупно патни трошоци и закупнина изнесуваат 21МИЛИОН 302 ИЛЈАДИ И 46 ДЕНАРИ!

Да направиме една последна весела математика и да дадеме еден предлог.

Стазата за Формула 1 во Монако е долга 3.337 km, за една трка се поминуваат 78 кругови, што изнесува вкупно 260.286 km. Доколку се земе дека просечно, Ф1 троши 40 литри гориво на 100 километри и таа количина се помножи со должината на стазата во Монако, се добива бројка од 104 литри за една трка на стазата во Монако. Доколку просечната цена на горивото е 50 евра за литар, тоа би значело дека за една трка горивото чини 5.200 евра.

Накратко, пратениците со нивните 21.302.046 денари чинат колку 66 трки со Формула 1 на стазата во Монако! Предлогот е, зошто Македонија не го финансира Макс Верстапен, наместо да плаќа патни трошоци за пратениците? И вака и така фајде од нивната работа не видовме, Верштапен барем ќе ја промовира Македонија по светот.

Мала шала, ама работата не е за смеење. Чекајте вие болници, училишта, градинки, тие ќе си прават „иди ми, дојди ми“. Може нема за лекови, за инсулин или за греење, но за патни трошоци на големиве фаци има.

За 30 години ниту власта, ниту народот не најде за потребно да го реши овој проблем кој одлева милиони од Буџетот, непотребно, имајќи предвид дека пратениците земаат плата повеќе од 3.000 евра месечно, па веројатно не би им било проблем да си стават гориво сами како што прави целиот останат народ што работи во различни градови.

Ама има една стара народна, додека има овци, ќе има и волна…