Известувачот за Србија во Европскиот парламент, европратеникот и поранешен шеф на хрватската дипломатија, Тонино Пицула, денеска изјави дека падот на српската влада е резултат на зголемениот притисок на домашната јавност предводена од студентите, а не на притисок од странство врз претседателот Александар Вучиќ, пренесе „Данас“.
Претходно, премиерот Вучевиќ, образложувајќи ја својата оставка, рече дека падот на владата се случил поради „притисок од странство“.
„Падот на српската влада е последица на зголемениот притисок врз режимот на Александар Вучиќ од спонтано мобилизирана домашна јавност предводена од студенти, а не „невидливата рака“ на силите од странство како што ја претстави премиерот во оставка. Наспроти тоа, некои од највлијателните политичари од земјите-членки на ЕУ, исто како и претседателот на Комисијата, му дадоа отворена поддршка на српскиот претседател“, изјави Пицула.
Тој рече дека ќе се види дали „поддршката за автократијата ќе остане непроменета и по евидентниот колапс на сегашниот модел на владеење со Србија“.
„Мора да се даде одговор и на прашањето дали масовните протести имаат доволен трансформациски капацитет за подлабоки промени во земјата. Тоа секако зависи од понатамошните потези на спротивставените страни“, рече Пицула.
