Судот на правдата на ЕУ ја забрани последната таканаречена програма за златни пасоши во Европската Унија. Сепак, некои земји сега бараат дупки во законот за да можат да заработат пари.

Мануел Делија не можеше да поверува кога пристигна пресудата на Судот на правдата на Европската Унија од 29 април. „Малку вреснав“, изјави тој за Дојче веле. „Очекував лоши вести.“ Како блогер за борба против корупцијата и извршен директор на малтешката организација на граѓанското општество „Република“, тој дванаесет години води кампања против програмата на малтешката влада со која се нуди државјанство на странски инвеститори.

Малта беше последната земја од Европската Унија што понуди таканаречени „златни пасоши“. Другите програми „пари за државјанство“ во Бугарија и Кипар се укинати во последниве години. Одлуката, вели тој, ја оправдува работата на неговата колешка и пријателка Дафне Каруана Галиција, убиената малтешка новинарка која се истакна во борбата против корупцијата и беше меѓу првите што ги посочи опасностите од овие „без рецепт“ програми за државјанство.

Во 2022 година, Европската комисија отвори постапка против Малта поради нејзината практика на доделување државјанство во голема мера врз основа на инвестиции во недвижнини, тврдејќи дека примателите на државјанство на ЕУ мора да покажат „вистинска врска“ со земјата што го издала пасошот, а не само финансиска обврска. Највисокото правно тело на ЕУ утврди дека малтешката политика го сведува државјанството на „обична комерцијална трансакција“ и дека „оваа практика не дозволува воспоставување на потребната врска на солидарност и добра волја меѓу земјата-членка и нејзините граѓани, ниту пак обезбедува меѓусебна доверба меѓу земјите-членки“. Делија рече дека има добро чувство за одлуката бидејќи се темели на „вредности, принципи, солидарност“ меѓу земјите-членки на ЕУ, со оглед на тоа дека секој со малтешки пасош има пристап до други земји на ЕУ.