Неименуван функционер на Белата куќа потврди за Би-Би-Си дека американскиот претседател Доналд Трамп одлучил неговата земја да ја ослободи Унгарија од санкциите за купување руска нафта и гас во период од една година.
Трамп претходно изјави дека ќе разгледа ослободување на Унгарија од санкциите, за кои Трамп тврди дека се обидува да ги искористи за да ја запре агресијата на Русија врз Украина. За време на вчерашната средба со унгарскиот премиер Виктор Орбан во Белата куќа, тој изјави дека е многу тешко за Унгарија да добива нафта и гас од други области.
По овој состанок, унгарскиот министер за надворешни работи, Петер Сијарто, напиша на социјалната мрежа X дека Соединетите Американски Држави ѝ дале на неговата земја „целосно и неограничено ослободување од санкции“.
Ова се случи откако САД минатиот месец воведоа санкции против двете најголеми руски нафтени компании и се заканија со санкции против оние кои ќе купат руска нафта. Ослободувањето на Унгарија од санкциите се смета за голема победа за Орбан. Тој претходно изјави дека санкциите би можеле да ја уништат унгарската економија, пишува Би-Би-Си.
The post САД ја ослободија Унгарија од санкциите за купување руска нафта и гас appeared first on Во Центар.
