Доналд Трамп е единствениот светски лидер способен да го спречи Владимир Путин да ја загрози Европа, тврди полскиот претседател Карол Навроцки.
Во интервју за Би-Би-Си, тој рече дека на рускиот лидер не треба да му се верува, туку дека Европа мора да направи сè што може за да го поддржи американскиот претседател во неговите напори за завршување на војната во Украина.
Навроки веќе беше добро познат како верен поддржувач на Доналд Трамп дури и пред тој да пристигне во Велика Британија на средби со премиерот Кир Стармер и други.
Сега тој вели дека, со оглед на тоа што Русија на Владимир Путин ја загрозува неговата земја, како и Централна и Источна Европа, американскиот претседател е единствената личност која може, како што изјави, да го реши овој проблем и да ја заврши војната во Украина.
По повод масовниот упад на руски беспилотни летала во септември минатата година, кога повеќе од 20 беспилотни летала влегоа во Полска од Белорусија и Украина, претседателот Навроцки го нарече тоа „вонредна ситуација“, додавајќи дека „дотогаш, ниедна земја-членка на НАТО не доживеала напад со беспилотни летала од таков обем“.
Русија ја тестираше полската одбрана и солидарноста на НАТО, тврди Навроцки.
Потоа полскиот претседател ѝ се заблагодари на Велика Британија за испраќањето авиони „Тајфун“ на РАФ за да помогнат во одбраната на границите на Полска. Тој рече дека Полска е во состојба на хибридна војна со Русија од 2021 година, додека се справува со беспилотни летала и дезинформации.
Тој беше прашан за неговото пријателство со Доналд Трамп, особено во светлината на заканите на американскиот претседател дека „со сите средства“ ќе ја преземе данската автономна територија Гренланд, што ја вознемири Европа и се заканува да го поткопа 77-годишниот НАТО сојуз.
Соединетите Американски Држави, тврди тој, и покрај неодамнешните изјави на американските претставници, сè уште се гарант на безбедноста во Европа. Она што Доналд Трамп го прави во име на Европејците „заслужува поддршка и големо почитување“.
Претседателот Навроки рече дека гледа како Европа може да се одвои од Соединетите Американски Држави и додаде дека тоа не е добро за економската или воената безбедност на Европската Унија.
Сепак, непријатното прашање за Гренланд останува. Оваа тема, вели тој, треба да ја дискутираат само данскиот премиер и претседателот Трамп. Карол Навроцки е уверен дека ова прашање ќе се реши преку НАТО и дијалог меѓу Данска и САД.
Во ова интервју, претседателот Навроки, исто така, ги критикуваше европските лидери за, како што рече, справувањето со „не толку важни работи, идеолошки прашања како што се зелениот план, климатската политика, прашањата за миграцијата“.
Европа, рече тој, не ја изградила својата отпорност и безбедност со текот на годините, додека Полска сега издвојува речиси пет проценти од својот БДП за одбрана.
The post Полскиот претседател: Само Доналд Трамп може да го запре Владимир Путин appeared first on Во Центар.
