Скоро сите имаме денови кога кафето едноставно не е доволно. Без разлика дали сме биле будни цела ноќ со болно дете, сме учеле доцна или сме излегле премногу надвор среде работната недела, многумина од нас посегнуваат по енергетски пијалок како брз извор на енергија. Но, пред да посегнеме по лименка, вреди да се запрашаме каков ефект имаат таквите пијалоци врз здравјето на нашето срце.
Главната состојка во енергетските пијалоци е кофеинот, најшироко консумираниот стимуланс во светот. Според упатствата на FDA, 400 милиграми кофеин дневно се смета за горна граница за здрави возрасни лица, но кардиологот Б. Кит Елис вели дека препорачува значително помали количини за неговите пациенти со срцеви заболувања.
„Кофеинот го стимулира срцето, па затоа може да го зголеми срцевиот ритам“, вели Елис за EatingWell.
„Исто така, може да ги стесни крвните садови и да го зголеми крвниот притисок.“
Нутриционистот за здравје на срцето, Бенџамин Сајзмор, додава дека кофеинот „може да ја зголеми срцевата контрактилност, што значи дека срцето мора да работи малку понапорно.“
Елис предупредува дека дури и луѓе без познати срцеви проблеми можат да развијат нарушувања на срцевиот ритам поради висок внес на кофеин. Тој вели дека некои може да доживеат аритмии предизвикани од кофеин, вклучително и недијагностицирана суправентрикуларна тахикардија, состојба во која срцевиот ритам може брзо да се зголеми.
Несоницата, нервозата и вознемиреноста се знаци на прекумерна консумација.
Проблемот е што енергетските пијалоци, поради нивниот сладок и газиран вкус, лесно се консумираат во големи количини. Еден енергетски пијалок од пет децилитри може да содржи до 300 милиграми кофеин, а ако на тоа се додаде кафе, дневната граница многу лесно се надминува.
Дополнителните состојки во енергетските пијалоци можат дополнително да ги засилат ефектите на кофеинот. Сајзмор објаснува дека „многу од адитивите во енергетските пијалоци имаат сличен состав на кофеинот и затоа можат да дејствуваат синергистички“. Женшенот, на пример, може да го зголеми срцевиот ритам и крвниот притисок кога се комбинира со кофеин.
Тауринот е безбеден сам по себе во соодветни количини, но кога се комбинира со големи количини кофеин, може дополнително да го зголеми крвниот притисок. Л-карнитинот, кој исто така често се додава, има мешани резултати кога станува збор за неговите ефекти врз здравјето на срцето. Елис, исто така, предупредува за високите нивоа на додаден шеќер и натриум во многу енергетски пијалоци, чија прекумерна консумација е поврзана со поголем ризик од кардиоваскуларни заболувања.
И двајцата експерти советуваат да не се навикнуваат енергетските пијалоци. Повремената консумација може да биде прифатлива, но редовната консумација може да доведе до срцеви проблеми.
.„Понекогаш гледаме луѓе со висок крвен притисок или забрзан срцев ритам и дури откако ќе разговараме со нив сфаќаме дека пијат енергетски пијалоци секој ден“, вели Елис.
Сајзмор додава дека несоницата, нервозата и анксиозноста се знаци на прекумерна консумација и заклучува: „Постојат многу други начини да се добие енергија, а побезбедно е да се изберат извори на кофеин каде што точно знаеме што консумираме и во која количина“.
The post Кардиолозите открија што се случува со вашето срце кога пиете енергетски пијалоци секој ден appeared first on Во Центар.
