Собраниската комисија за социјална политика, демографија и млади го испрати предлог-законот за изменување и дополнување на Законот за пензиско и инвалидско осигурување на понатамошна постапка во Собранието. Амандманите, по скратена постапка, предлагаат зголемување на сите пензии за 1.000 денари од 1 март годинава.
Пратеничката Ангелинка Петкова од ВМРО-ДПМНЕ нагласи дека ова е четврта измена на законот, а пензионерите добиле вкупно зголемување од 7.000 денари за нешто помалку од две години.
„Овие законски измени предвидуваат четврто зголемување на сите пензии за 1.000 денари за сите пензионери кои оствариле право на пензија до 28 февруари 2026 година. Од 1 март тие ќе добиваат дополнителни 1.000 денари. Со овие законски измени, Владата на Република Македонија ја постигна стратешката цел за подобрување на стандардот на сите пензионери, а оваа придобивка од 7.000 денари, вкупно зголемување на пензиите досега, ја почувствуваа над 320.000 пензионери“, рече Петкова.
Според пратеничката Имрлије Салиу-Фетаи од ВЛЕН, новото законско решение има за цел подобрување на стандардот на пензионерите.
„Со овие законски измени, како што ветивме, ги исполнивме тие ветувања. Сега сме во последната фаза на зголемување на пензиите за 7.000 денари. Претходните фази резултираа со две зголемувања од по 2.500 денари, а сега имаме уште едно линеарно зголемување од 1.000 денари за сите категории пензионери. Овој факт е од големо значење за пензионерите и ќе има придобивки во намалувањето на сиромаштијата“, рече Салиу-Фетаи.
The post Зголемувањето на пензиите за 1.000 денари од 1 март беше одобрено од матичната комисија во Собранието appeared first on Во Центар.
