СДСМ поднесе кривична пријава до Јавното обвинителство против сопствениците на телевизијата Алфа поради постоење на сериозни сомнежи за организирана шема на перење пари, даночно затајување и фалсификување деловни книги.
„Пријавата е поднесена против повеќе физички и правни лица, меѓу кои и Питер Шац, мнозински сопственик на Алфа ТВ, како и управителите на „Таргет Медиа“ и „Алфа Скоп“ ДОО, поради основано сомнение за сторени повеќе кривични дела, изјави Александар Саша Димитријевиќ, генерален секретар на СДСМ.
Во периодот од 2017 година наваму, како што посочи Димитријевиќ, преку меѓународна мрежа на трансакции биле префрлени околу 2,85 милиони евра од странство кон Македонија, кои потоа завршувале во Алфа ТВ.
Овие средства, вели тој, биле прикривани преку фиктивни договори за маркетинг и реклами со компании кои немаат реална економска активност на македонскиот пазар. Преку т.н. „shell“ компании се заобиколувале законите за транспарентност на медиумската сопственост и финансирање.
Финансиската полиција, како што рече Димитријевиќ, веќе констатирала дека се работи за „сомнителни маркетиншки услуги“ со цел прикривање на потеклото на парите.
„Понатаму, постојат основани сомнежи дека биле склучувани нелогични договори и внесувани невистинити податоци во деловните книги, со цел легализација на сомнителен капитал. Накратко, постојат сериозни сомнежи за перење пари преку лажни реклами и сомнителен капитал како извор на финансирање. За ова имало започната постапка, која очигледно се држи во фиока. Слободата на медиумите не значи слобода за перење пари, ниту одработување во интерес на странски авторитарни режими“ изјави Димитриевиќ.
Пронајдете не на следниве мрежи:
