Полициските службеници кои избегаа од напаѓачот за време на вчерашниот напад во Киев се суспендирани од должност, објави началникот на украинската национална полиција, Иван Вихивски.

Според наредбата на министерот за внатрешни работи, Игор Клименко, започната е официјална истрага за дејствијата на патролните полицајци на местото на пукањето во округот Голосеев“, рече Вихивски, пренесува „Униан“.

Тој нагласи дека, за време на истрагата, полицајците кои избегале од местото на терористичкиот напад се суспендирани од должност.

Мораме да ги утврдиме сите околности на инцидентот без исклучок: се проучуваат достапните видео материјали, вклучително и оние дистрибуирани на интернет, а сведоците се испрашуваат, истакна тој.

Сите собрани информации ќе бидат доставени до Државното биро за истраги.

„Служи и заштити“ не е само слоган. Мора да биде поткрепен со соодветни професионални акции. Особено во критични моменти кога животите на луѓето зависат од тоа, рече министерот за внатрешни работи на Украина, Игор Клименко.

Клименко му нареди на Вихивски да спроведе официјална истрага за постапките на полицајците за време на терористичкиот напад во Киев и да ги достави сите информации до Државното истражно биро, откако на интернет се појави видео на кое се гледаат полицајци како бегаат од напаѓачите за време на терористичкиот напад во Киев и ги оставаат обичните луѓе без одбрана.

Маж вооружен со автоматско оружје вчера отворил оган врз минувачи на улицата во киевската област Демивка во саботата, а потоа влегол во супермаркет во областа Голосеевски, каде што зел заложници, од каде што продолжил да пука.

Напаѓачот бил убиен на лице место, за време на обидот на полицијата да го уапси.

Истражителите на украинската безбедносна служба го окарактеризираа пукањето во Киев, во кое беа убиени најмалку шест лица, а најмалку 14 беа ранети, како терористички чин.