Велика Британија и Франција во четврток потпишаа нов мултимилионски договор, чија цел е намалување на бројот на мигранти што го преминуваат Ламанш во мали чамци, со зголемени полициски патроли и зголемен надзор во северна Франција.
Според договорот, Велика Британија ќе обезбеди 576 милиони евра за зајакнување на мерките во северна Франција, а дополнителни 185 милиони евра ќе зависат од успехот на новите тактики за ограничување на преминувањата низ Ла Манш. Доколку тие напори не бидат успешни, дополнителното финансирање ќе биде суспендирано по една година, соопшти британското Министерство за внатрешни работи.
Договорот предвидува зголемување на бројот на распоредени полицајци од сегашните 907 на 1.392 за периодот од 2026 до 2029 година, како и формирање на дополнителна полициска единица за борба против нелегалната миграција, која ќе биде финансирана од Франција, објави француското Министерство за внатрешни работи.
Договорот, исто така, вклучува распоредување на нови технологии насочени кон намалување на бројот на таканаречени „такси-чамци“ – мали моторизирани пловила, обично надувувачки, што ги користат шверцерите за собирање мигранти по долги делови од северниот француски брег.
Договорот, исто така, ги проширува можностите за надзор преку беспилотни летала, хеликоптери и електронски мониторинг, со цел поефикасно спречување на граничните преминувања.
Откако беше формирана пред речиси две години, владата на британскиот лабуристички премиер Кир Стармер спроведе голем број политики за кои се надева дека значително ќе ја намалат имиграцијата, и легалната и нелегалната.
Преминувањето со мали чамци стана важно политичко прашање во Велика Британија во последниве години. Гневот поради очигледната неспособност на повеќе влади да го решат проблемот доведе до серија демонстрации и немири во текот на изминатите неколку години и го поттикна метеорскиот подем на десничарската партија Реформи на Најџел Фараж.
Од почетокот на годината, повеќе од 6.000 мигранти пристигнале во Велика Британија преку Ламанш, што е пад од 36 проценти во споредба со истиот период минатата година, што делумно може да се должи на понестабилните временски услови.
Во 2025 година, 41.472 луѓе го преминале Ламанш, што е втор највисок годишен број од 2018 година, кога се водат евиденции. Рекордот е поставен во 2022 година, кога 45.755 луѓе го преминале Ламанш.
Минатата година, француската полиција уапси 480 шверцери на мигранти.
The post НОВ ДОГОВОР МЕЃУ ВЕЛИКА БРИТАНИЈА И ФРАНЦИЈА: Еве што ќе се направи за да се намали бројот на мигранти што го преминуваат Ламанш appeared first on Во Центар.
