Најновиот глобален енергетски шок, предизвикан од конфликтот на Блискиот Исток, ги остави јавните финансии на земјите од еврозоната во значително полоша позиција отколку што беа за време на енергетската криза во 2022 година, предупредуваат експертите на Европската централна банка (ЕЦБ).
Фискалниот простор на владите сега е многу поограничен, поради што средствата за помош на економијата и граѓаните се намалени на само 0,1 процент од БДП на ниво на Еврозоната, се додава во анализата.
На почетокот на обете кризи, стапката на јавен долг во Еврозоната беше на слично ниво од околу 89 проценти од БДП, но условите за задолжување денес се значително потешки отколку во 2022 година, кога беа на историски најниски нивоа.
Високите каматни стапки и повисоките премии за ризик го прават рефинансирањето на долгот поскапо оваа година, се забележува во текстот.
Покрај тоа, структурниот буџетски дефицит на еврозоната во 2026 година изнесува 3,3 проценти од БДП, во споредба со 2,6 проценти пред кризата во 2022 година, додека буџетите се дополнително оптоварени со планираните големи издвојувања за одбрана и инфраструктура во Германија и другите членки на НАТО, според ЕЦБ на својата веб-страница.
Тековните мерки за државна помош оваа година вклучуваат главно привремени намалувања на даноците за енергија, пониски стапки на ДДВ и целни субвенции за гориво и електрична енергија, и тие се значително поскромни отколку во 2022 година.
Европската централна банка апелира до владите во еврозоната и предупредува дека целата идна поддршка поради војната на Блискиот Исток мора да биде привремена, строго насочена и прилагодена на најранливите слоеви на општеството, со цел да не се загрози фискалната стабилност на еврозоната.
The post Еврозоната повеќе нема пари за големи субвенции appeared first on Во Центар.
