Министерството за правда на САД го обвини Иран за „перење“ на повеќе од 1,5 милијарди долари приходи од „нелегална“ продажба на нафта преку мрежа за тргување со криптовалути во Кина, барајќи заплена на 61 милион долари, објави иранската новинска агенција Мехр.
Според Министерството за правда на САД, кинеските компании „Блесд Траст“ и „Хекса Вејл“ биле дел од мрежа која ги конвертирала приходите од продажба на иранска нафта во криптовалути и ги префрлала парите на иранската влада, нејзините посредници и поврзаните организации.
Компаниите користеле сметки на берзата за криптовалути Binance, со седиште во Обединетите Арапски Емирати, според соопштението од американското Министерство за надворешни работи.
„Блесд Траст“ се претстави пред давателите на финансиски и криптовалутни услуги како компанија за управување со средства и чување дигитални средства, се додава во соопштението, додека компанијата, според нив, всушност примила и префрлила пари од продажба на иранска сурова нафта и нафтени производи и учествувала во нивната конверзија во криптовалути.
„Хекса Вејл“ обезбедувала слични услуги, претставувајќи се како посредник во трговијата со стоки, според соопштението.
Министерството за правда на САД тврди дека мрежа од поврзани криптовалутни адреси примила и пренасочила повеќе од 1,5 милијарди долари приходи од продажба на иранска нафта. Тие пренасочиле дел од парите кон посредници кои работеле за Иранската револуционерна гарда (IRGC), како и кон криптовалутни и берзански адреси во Иран кои американските власти ги поврзале со таа организација.
Како дел од таа шема, „Блесд Траст“ и „Хекса Вејл“ наводно го користеле американскиот финансиски систем, преку кој примиле и испратиле десетици милиони долари. Министерството за правда нагласи дека изнесените тврдења се дел од барањето за заплена и дека тие сè уште не се докажани на суд.
Министерството сега бара заплена на 61 милион долари приходи од продажбата на нафта во Иран, тврдејќи дека станува збор за пари кои се предмет на санкции на САД, а кои биле префрлени во криптовалути преку наведената мрежа.
„Со овој потег, покажуваме дека сме цврсто решени да им ги одземеме парите што ги користат иранската влада и нејзините терористички сојузници за да ја загрозат безбедноста на граѓаните“, изјави заменик-генералниот обвинител на САД, Шон С. Бакли.
Иранската новинска агенција Фарс во неделата објави, повикувајќи се на неименуван извор, дека приходите на Иран од продажба на нафта надминале 2,5 милијарди долари само од 23 август.
Во првите пет месеци од иранската година што започнува на 21 март, таа надмина 13 милијарди долари, според Фарс.
Во првите четири месеци од иранската година, што заврши на 20 јули, приходите во буџетот на Иран од продажба на нафта достигнаа 91 трилион томани (7,5 милијарди долари), објави Фарс на почетокот на минатата недела, повикувајќи се на документ до кој имаше пристап.
The post САД бараат заплена на 61 милион долари од приходите од иранската нафта appeared first on Во Центар.
