Турски суд во понеделникот го осуди комичарот Дениз Ѓокташ на повеќе од 19 месеци затвор под обвинение за навредување на верските вредности и на претседателот Реџеп Таип Ердоган. Комичарот е ослободен до одлуката по жалбата.

Ѓокташ (32) се наоѓал во притвор од 3 јули, откако на интернет биле споделени снимки од неговиот настап во кој, меѓу другото, го нарекол Ердоган „диктатор“.

Во понеделникот тој беше прогласен за виновен за навредување на претседателот и за навредување на верските вредности, со вкупна затворска казна од 19 месеци и 10 дена.

Во својата одбрана, која предизвикала смеа во судницата во Истанбул, комичарот изјавил дека стои зад својата шега во која го опишал Ердоган како лидер кој од „срамежлив диктатор“ се претворил во диктатор „сигурен во својот идентитет“.

Ѓокташ рекол дека политичкиот хумор во минатото бил толериран и дека законите поврзани со навредата не биле променети.

„Што се промени? Кревките лидери кои не можат да поднесат шеги или критики“, изјавил тој во коментарите објавени во весникот „Биргјун“ и во други медиуми кои ја поддржуваат опозицијата.

Тој истакнал и дека неговите шеги не предизвикале никаква пријава сè додека не биле извадени од контекст и споделени на социјалните мрежи.

Настапот на Ѓокташ, „Мртво Море“, бил снимен во Истанбул во јуни и собра повеќе од 9,5 милиони прегледи откако бил објавен на Јутјуб. На судењето било кажано дека преку системот за пријавување што го води канцеларијата на Ердоган биле поднесени 185 пријави.

Ѓокташ бил уапсен по враќањето во Турција од одмор и бил задржан во затворот со висок степен на безбедност „Каратепе“ во провинцијата Текирдаг, западно од Истанбул.

Ердоган ја консолидираше својата власт во текот на повеќе од две децении на чело на Турција, а неговите критичари велат дека постепено се стеснува просторот за слободно изразување. Новинарите и критичарите на владата често се соочуваат со истраги, притвори или судски постапки.

Градоначалникот на Истанбул, Екрем Имамоглу, главниот политички ривал на Ердоган, е во затвор од март минатата година и му се суди под обвинение за корупција.

Стотици градоначалници и други функционери од главната опозициска партија, исто така, се гонат поради наводи за корупција, додека лидерот на партијата беше разрешен со судска одлука. Критичарите велат дека овие потези имаат цел да ја неутрализираат партијата пред следните избори.

Владата на Ердоган, пак, инсистира дека турските судови се непристрасни и работат независно од политичкиот притисок.