Доколку на претстојните избори не биде постигнат потребниот цензус за избор на претседател постојат две можности – шефот на државата да се избира непосредно од граѓаните без потребно мнозинство во вториот круг или да се избира во Собранието.
Вака денес одговори министерката за правда Рената Дескоска, прашана дали се размислува за менување на Уставот во делот на изборот на претседател, доколку не биде постигната потребната излезност на претседателските избори.
– Ние имаме препорака од Венецијанска комисија дека цензусот што постои во Уставот за избор на претседател е нешто што не е соодветно и мора да биде тргнато. Тоа е препорака што се провлекува уште од претходните избори. Странските експерти веќе забележале дека има нешто што е нетипично во другите земји што некогаш на некој начин може да претставува опасност за да не може успешно да се спроведат претседателски избори. Менувањето на Уставот со цел да се олесни процесот на избор на претседател е нешто што веќе е препорачано и од ОБСЕ односно ОДИХР. Има две опции, едната е претседателот да се избира на непосредни избори без потребно мнозинство на излезност во вториот круг. Тоа значи кој ќе добие повеќе гласови победува и тука немате можност да минирате избори преку бојкот. Другата опција е избор на претседател во Собрание. Тоа се две различни опции кои се можни и кои постојат во компаративното право, изјави Дескоска по денешната Еропсока конференција за медијација.
Според сегашното решение во Уставот, за да се избере претседател во првиот круг од изборите, неопходно е за него да гласаат најмалку 904.066 граѓани со право на глас, односно мнозинство од вкупно запишаните 1.808.131 избирачи. Доколку во првиот круг никој не го добие потребното мнозинство, во вториот круг одат двајцата кандидати што освоиле најмногу гласови. За претседател ќе биде избран кандидатот кој добил мнозинство од гласовите, доколку на гласачките места излегле повеќе од 40 насто од запишаните избирачи, односно 723.253 гласачи.
Доколку и во вториот круг ниту еден од двајцата кандидати не добие потребен број гласови, целата постапка се повторува.
