Ким Џонг-хјун, министерот за одбрана на Јужна Кореја, тврди дека Северна Кореја најверојатно ќе испрати војници во Украина за да им помогне на руските војници.

Јужнокорејската новинска агенција Јонхап објави дека оваа изјава ја дал вчера пред пратениците на националниот парламент во Сеул, пишува Киев Индипендент.

– Бидејќи Русија и Северна Кореја потпишаа договор кој наликува на воен сојуз, веројатноста да бидат испратени војници е многу голема – рече министерот.

Украинската веб-страница потсетува дека Москва и Пјонгјанг ја продлабочиле воената соработка додека Русија се обидува да обезбеди оружје и друга поддршка за целосната војна што ја води во Украина.

Запрашан за неодамнешниот извештај на украинските медиуми дека припадниците на севернокорејската армија се убиени и ранети во близина на Доњецк, кој е под контрола на Русија, јужнокорејскиот министер рече дека тоа исто така може да биде вистина.

– Веруваме дека има ранети и убиени меѓу севернокорејските војници во Украина – изјави Ким Ким Џонг Хџун, а пренесува Политико.

Се вели дека Северна Кореја и доставува на Русија големи количества артилериски гранати и балистички ракети.

Воената стратегија на Москва бара огромна потрошувачка на ова оружје, кое служи за уништување на непријателските позиции и подготовка на копнени напади.

Уште во 2023 година беше спомнато дека севернокорејската војска или полиција помагаат во „обновата“ во деловите на Донбас кои се под контрола на Русија, а дека во јули оваа година од Пјонгјанг таму пристигнале воени инструктори.

Се потсетува дека Русија и Северна Кореја потпишаа пакт за заедничка одбрана за време на посетата на рускиот претседател Владимир Путин на Пјонгјанг на почетокот на оваа година, кога тој беше гостин на севернокорејскиот лидер Ким Џонг Ун.

– Односите меѓу Русија и Северна Кореја се развиваат така што се речиси на ниво на воен сојуз. Бидејќи е така, веруваме дека повеќе севернокорејски војници би можеле да бидат испратени во војна – заклучи Ким Џонг Хџун.