Најголемиот европски производител за литиум – јонски батерии БМЗ Холдинг од Карлштајн на Мајна ги реализира најавите за инвестирање во Македонија со регистрирање на своја компанија во Скопје, а премиерот Христијан Мицкоски ќе присуствува во ТИРЗ Скопје на одбележување на почеток на инвестиција на германската компанија.
На 4 септември 2023 -та година во Франкфурт, Германија, поранешниот вицепремиер задолжен за економски прашања, Фатмир Битиќи присуствуваше на настанот на потпишување на договор со компанијата БМЗ која ќе произведува литиумски батерии во вредност од 65 милиони евра.
По точно една година, во недостаток од реализација на конкретни инвестиции и проекти, туку само спектакуларни најави, во исчекување на унгарскиот кредит Мицкоски не само што го најави како свој, туку рече и дека ќе присуствува на започнување на камен темелникот во текот на утрешниот ден во Технолошко индустриски развојни зони -ТИРЗ.
Информацијата дека оваа германска компанија е БМЗ, за Рацин.мк ја потвди и Битиќи, а БМЗ својот раст и развој го проектира врз основа на истражување и развој, на напредно знаење, што значи дека во нашето стопанство ќе донесе иновативни технологии, практики на управување и експертиза, кои воедно може да се пренесат и на домашните компании во Северна Македонија.
Тоа значи дека и Македонија ќе биде индустриски извозник на литиум – јонски батерии, кои економистите во последно време ги нарекуваат „новото злато“. Македонија има скромен удел во извозот на овој вид батерии, што најчесто се користат за напојување на мобилни уреди, со само 2.000 долари во 2019 година, покажуваат податоците на World’s top exports. Спорд информациите на „Фактор“, БМЗ Холдинг во Македонија ќе произведува батерии за помали возила, како тротинети и велосипеди.
BMZ прави батериски системи за широк опсег на апликации, па дури и „сториџи“ за складирање на електрична енергија произведена од соларни панели и турбини на ветер. Баварскиот гигант има околу 2,3 илјади вработени и проценет годишен приход од 460 милиони евра.
Групацијата BMZ развива и произведува високотехнолошки батериски системи, кои се инсталирани низ целиот свет во најразновидните производи на познати брендови. Произведува и батериски системи со свои брендови. Освен производител, компанијата за себе вели дека е брзорастечка компанија и лидер во иновациите, најновите технологии и производствени процеси. Освен што е лидер во научно-истражувачката работа на ова поле, има и широкораспространета мрежа на клиенти. Има повеќе од 230 инженери во истражувачкиот центар. Компанијата развива повеќе од 100 нови производи секоја година.
Инаку литиумот за батерии неколку години наназад ја менува геополитичката слика на светот. Неговиот електрохемиски потенцијал го направи стратешки метал за иднината, особено на автомобилската индустрија. Побарувачката за литиум во светот е се поголема. Најголем производител на литиум-јонски батерии е Кина, а најголеми европски потрошувачи се Германија, Велика Британија и Франција. По глава на жител водат скандинавските земји.
Извор: Рацин
