Канцеларијата за врски на воената мисија на НАТО во Белград соопшти дека прашањето за враќање на задолжителниот воен рок во Србија е прашање на српските државни органи.
„НАТО ќе продолжи да ги поддржува напорите на Србија за модернизација на своите вооружени сили во рамките на билатералниот развој и партнерство“, се вели во одговорот на НАТО испратен до Радио Слободна Европа на 10 јануари.
Западната воена алијанса на НАТО, исто така, рече дека целосно ја почитува воената неутралност на Србија.
„Сè што прават Србија и НАТО заедно е приспособено да ги задоволи потребите на Србија и да и помогне да ги подобри своите вооружени сили во рамките на Партнерството за мир“, се вели во одговорот на Канцеларијата за врски на алијансата во Белград.
Иницијативата за враќање на задолжителниот воен рок ја покрена Генералштабот на Армијата на Србија, а предлогот беше испратен до српскиот претседател Александар Вучиќ на 4 јануари.
Во своето образложение, армијата рече дека предлогот доаѓа „по детален преглед на целокупната безбедносна ситуација и современите предизвици со кои се соочува Србија како воено неутрална земја“.
Србија се откажа од задолжителниот воен рок на 1 јануари 2011 година и оттогаш само оние што сакаат можат да одат во војска.
Србија се декларира како воено неутрална држава и тоа е вклучено и во Стратегијата за одбрана и Стратегијата за национална безбедност, кои беа одобрени од Собранието во 2019 година.
Српските власти рекоа дека Србија не сака да влезе во НАТО, со кој соработува од 2006 година преку програмата Партнерство за мир.
Србија е една од ретките земји од Западен Балкан која не сака да се приклучи на западната воена алијанса.
Пронајдете не на следниве мрежи:
