Конфликтот со Русија ја претвори Украина во „најминирана земја“ во светот, пишува „Вашингтон пост“, повикувајќи се на податоци на украинската влада.

Речиси една третина од територијата на Украина е зафатена од тешки борби и веројатно ќе бидат потребни интензивни операции за деминирање, пишува весникот, додавајќи дека повеќе од 67.000 квадратни милји (173.529 квадратни километри) се загадени со неексплодирани убојни средства, според истражувачки центар со седиште во Словачка GLOBSEC.

Тоа е повеќе од големината на Флорида и приближно е еквивалентно на Уругвај.

„Количината на смртоносни средства во Украина е без преседан во изминатите 30 години“, изјави програмскиот директор на британската невладина организација „Мајнс советници“ Грег Кутер.

Според ОН, речиси 300 цивили, меѓу кои 22 деца, загинале во Украина во инциденти со неексплодирани убојни средства помеѓу февруари 2022 и јули 2023 година, објави Вашингтон пост. Нагазни мини и други неексплодирани убојни средства, исто така, резултираа со 632 повредени цивили во истиот период, се додава.

Двете страни во конфликтот активно користат мини во своите операции, наведува весникот. Соединетите Американски Држави, исто така, придонесоа за ископувањето на украинска територија со снабдување на Киев со артилериски гранати од 155 милиметри кои создаваат привремени мински полиња, иако нивните подмуниции технички треба да се самоуништуваат, пишува Вашингтон пост.

Друго американско оружје испратено во Украина е противтенковската мина М21, која не може да се самоуништи, се додава.

Одлуката на Вашингтон да му обезбеди на Киев „касетна муниција произведена од САД, за кои е познато дека ги растера неексплодираните проектили, може само да ја зголеми опасноста“, пишува Вашингтон пост.

Според некои проценки, би можеле да бидат потребни 757 години да се отстранат сите неексплодирани убојни средства расфрлани низ земјата, дури и ако 500 тимови за деминирање биле задолжени за мисијата, објави Вашингтон пост.

Проценките на Светската банка покажуваат дека трошоците за овие операции би можеле да достигнат 37,4 милијарди долари само во следните десет години, се додава.

Според извештајот на Стејт департментот за 2023 година, Вашингтон досега има посветено само околу 95 милиони долари за операции за деминирање во Украина.

Заменик-генералниот секретар на ОН за политички и мировни прашања Розмари Ди Карло го предупреди Советот за безбедност на ОН дека огромни делови од украинската територија се покриени со мини и касетни бомби кои „ќе продолжат да претставуваат опасност за цивилите во наредните години“.

Претходно оваа недела, рускиот амбасадор во САД Анатолиј Антонов го осуди Вашингтон за претворање на Украина во „гробишта“ на смртоносен отпад.