Денес претпладне во земјава времето ќе биде сончево и многу топло. Во текот на денот и ноќта се очекува наоблачување, на места со пороен дожд и грмежи.
Според УХМР, локално процесите ќе бидат во форма на невреме со појава на град и силен ветер од над 70 километри на час. Услови за појава на дожд ќе има и во ноќните часови. Минималната температура ќе се движи од 12 до 22, а максималната од 32 до 40 степени Целзиусови. УВ индексот ќе изнесува 9.
И во Скопје и околината претпладнево ќе биде сончево и многу топло. Од пладне ќе има зголемена облачност и појава на повремено пороен дожд, грмежи, засилен ветер и услови за град. Температурата ќе се движи од 21 до 38 степени. УВ индексот ќе биде 9.
И утре ќе има услови за локална нестабилност со пороен дожд и грмежи, претежно попладне. Ќе дува слаб до умерен северен ветер, а дневните температури ќе бидат за пет до осум степени пониски. Посвежо ќе биде и во петок, а за викендот температурите ќе бидат во постепен пораст.
