Доцна синоќа по завршувањето на протестниот марш за одбелужвањето на 45-годишнината од бунтот против воената хунта грчката полиција се судри со групи маскирани лица во Атина, пренесуваат грчките медиуми. Во маршот учествуваа и министри и пратеници од „Сириза“.
Маскирани лица ја нападнаа полицијата со молотови коктели, дрва, камења, а палеа и канти за отпадоци. Специјалните полициски екипи возвратија со солзавец, шок бомби и водени топови.
Масовниот протест од Политехничкиот факултет до Амбасадата на САД заврши мирно, по што следеа инциденти во атинската населба Ексархија, што важи за собиралиште на анархистите, но и населба каде се наоѓа Политехничкиот факултет. Во нередите кои траеа речиси 4 часа беа уапсени 19 лица, неофицијално повредени двајца полицајци, а демонстранти го запалија американското знаме.
