Рускиот претседател Владимир Путин ги предупреди САД да не распоредуваат ракети со долг дострел во Германија.

Британскиот весник Гардијан наведува дека шефот на Кремљ рекол дека Вашингтон ризикува да започне ракетна криза како во Студената војна и ветил дека Москва ќе возврати на соодветен начин.

Се известува дека Путин рекол дека ако Америка инсталира ракети со долг дострел во Германија почнувајќи од 2026 година, Русија ќе распореди слични проектили за западните земји да бидат во нивниот дострел.

„Гардијан“ потсетува дека за две години САД ќе почнат да распоредуваат ракети со долг дострел во Германија во обид да ја покажат посветеноста на Вашингтон кон НАТО и европската одбрана.

Американските и германските власти претходно најавија дека овие „епизодни распоредувања“ ќе бидат во подготовка за подолгорочно распоредување на проектили, вклучувајќи ги СМ-6, крстосувачките ракети Томахавк и хиперсоничното оружје што се уште е во развој.

Тие ракети би имале поголем дострел од сегашните ракетни капацитети во Европа.

Денеска, во говорот што го одржа пред морнарите од Русија, Кина, Алжир и Индија на прославата на Денот на руската морнарица во Санкт Петербург, Путин рече дека САД ризикуваат да започнат нова ракетна криза од Студената војна со својот најнов потег.

– Времето на летот на ваквите ракети, кои во иднина би можеле да бидат опремени со нуклеарни боеви глави, до цели на наша територија ќе биде околу десет минути. Ќе ги преземеме истите мерки за распоредување, земајќи ги предвид дејствијата на Америка, нејзините сателити во Европа и другите региони во светот – рече Путин.