Средбата на Заедничката мултидисциплинарна експертска комисија за историски и образовни прашања, која се одржа во Скопје во текот на вчерашниот и денешниот ден, беше обележана со позитивен дух и конструктивна атмосфера. Учесниците водеа динамична и отворена дискусија за темите поврзани со работата на Комисијата, се истакнува во соопштението на Комисијата за историски прашања со Бугарија.

– На средбата се разгледуваа принципите на работа, како и протоколарни и процедурално-технички аспекти. Комисијата работеше на усогласување на записниците од претходните средби и се разговараше за препораките за македонските учебници за VII одделение, вели претседателот на Комисијата, проф. д-р Ванчо Ѓорѓиев.

Следната средба на Комисијата е планирана да се одржи во Софија до крајот на годината.