Иран планира во соработка со Русија да изгради гасовод чиј капацитет на долг рок би достигнал 110 милијарди кубни метри гас, изјави иранскиот амбасадор во Москва, Казем Џалали.

„На долг рок е планирана изградба на посебен гасовод меѓу Иран и Русија, со предвиден капацитет од 110 милијарди кубни метри, додека во првата фаза, во период од две до три години, капацитетот би изнесувал 55 милијарди кубни метри“, изјави Џалали за иранската државна телевизија.

Тој објасни дека соработката меѓу Москва и Техеран во гасниот сектор во моментов се развива во две насоки – краткорочна и долгорочна.

Според него, краткорочниот план предвидува користење на постојните гасоводи, што бара нивна реконструкција и соработка со Азербејџан, за што ќе биде потребно одредено време.

Како најбрзо решение се разгледува можноста за таканаречени своп-испораки. Тоа би значело испорака на руски гас во северниот дел на Азербејџан, а истовремено соодветна количина гас од јужниот дел на земјата да биде испорачана во Иран.

Џалали нагласи дека ваквиот модел би овозможил побрз почеток на енергетската соработка меѓу двете земји, додека изградбата на новиот гасовод би претставувала долгорочно решение за снабдување на Иран со руски гас.