Вашето дете го сака вечерното капење и изгледа возбудено за заминувањето на одмор. Но, кога стигнавте на плажа, детето не сакаше ни да ги брцне прстите во морето. Ако тоа сценарио ви звучи познато, не сте сами.
Многу често малите деца развиваат страв од вода, а нивните родители се чувствуваат фрустрирано и несигурно бидејќи не знаат како да ги натераат децата да ги надминат овие стравови. Постојат неколку тактики со кои можете да се обидете да му помогнете на вашето дете да го надмине стравот од вода.
Зошто децата се плашат од вода?
Во повеќето случаи, стравот на децата од вода може да се обвини за развојната незрелост. Бебињата не се секогаш свесни за водата како нешто од кое треба да се плашат и обично уживаат да се забавуваат во бања, езеро, океан или базен. Но, како што растат децата, вообичаено е да се плашат од вода. Според психолозите, стравот од вода најчесто го развиваат децата на возраст од 1 до 7 години.
Ако вашето дете имало лошо искуство во вода, дури и во када, како на пример лизгање, премногу прскање или несакано потопување, ова може да ги направи стравовите уште поголеми и потешки за справување. Некои деца можеби немале страшни искуства, но непријатни, како што е водата што им влегува во носот или очите и грижата дека тоа ќе се повтори, може да ги направи колебливи да влезат во водата.
Како да му помогнете на детето да го надмине стравот од вода?
Најдобро е да имате одмерен, емпатичен и смирен пристап. Ако покажете нервоза, децата ќе го почувствуваат тоа, а тоа само ќе им ги зголеми стравовите. Еве неколку стратегии што можете да ги испробате.
Постепено потопување: Оставете го детето постепено да се навикне на водата. Првиот ден нека ги потопува само прстите, вториот нека влезе до колена, па до половината итн. На некои деца едноставно им треба повеќе време и не ги присилувајте.
Набавете забавна опрема: Некои деца ќе се чувствуваат поудобно со шарени очила за капење, елек за спасување или ракавици за капење украсени со нивните омилени цртани ликови. Овие предмети можат да им помогнат на децата да се чувствуваат посигурно.
Побарајте стручна помош: Некои деца почесто слушаат возрасен кој не е нивниот родител. Еден љубезен и трпелив инструктор по пливање може да направи чуда. Плус е што професионалците имаат големо искуство со проблемот на децата кои се плашат од вода и ги знаат најдобрите трикови.
Влезете во вода со детето: На некои деца ќе им биде удобно ако влезете во вода со нив. Можете да ги придржувате или да ги држите за рака додека не се опуштат. Но, дури и кога тоа ќе се случи, не се оддалечувајте премногу. Американската академија за педијатрија препорачува родителите во секое време да бидат на дофат на раката за неискусните пливачи.
Разговор: Обидете се да разговарате со вашето дете за да ја разберете причината за неговиот страв од вода. Ако знаете со што се бори вашето дете, полесно ќе му помогнете да го надмине стравот и да се чувствува поопуштено во водата.
