Поранешниот американски претседател и републикански претседателски кандидат Доналд Трамп упати остро предупредување, тврдејќи дека раководството на администрацијата на претседателот Џо Бајден, особено потпретседателката и демократска претседателска кандидатка Камала Харис, ги води САД кон Трета светска војна, пренесува Newsweek.

„Кој преговара за нас на Блискиот Исток? Бомбите паѓаат насекаде! напиша Трамп на социјална мрежа.

„Заспаниот Џо Бајден спие на плажа во Калифорнија, злобно исфрлен од демократите, а другарката Камала е на турнеја со нејзиниот навистина лош избор за потпретседател. Ние не сакаме Трета светска војна, но одиме таму на тој начин. Нема да има иднина под другарката Камала Харис, бидејќи таа ќе нѐ одведе во нуклеарна светска војна, во третата светска војна“, напиша Трамп претходно.

Забелешките на Трамп доаѓаат во време на ескалација на насилството на Блискиот Исток и размена на оган меѓу Израел и Хезболах во Либан.

Трамп постојано изјавува дека би можел да ја реши војната во Украина во рок од еден ден и да донесе мир на Блискиот Исток доколку победи на изборите во ноември, без да наведе детали како ќе го направи тоа.