Али Ахмети денес од Скопјe побара ослободување на поранешните водачи на ОВК, Хашим Тачи, Кадри Весели, Јакуп Красниќи, Реџеп Селими, како и други војници обвинети од Хашкиот трибунал. Ахмети, во својот говор од плоштадот „Скендербег“, рече дека поранешните водачи на ОВК се обвинети за дела што никогаш не ги сториле, велејќи дека се бореле за слободата на народот.
Ахмети, исто така, рече дека Хашкиот трибунал треба да им оддаде признание и пофалби на поранешните водачи на ОВК, а не да ги осудува.
„ОВК ја осуди секоја фашистичка акција и акција против цивилното население. ОВК се прогласи за народна армија која се бори за слободата на својот народ. Голема вистина е дека не ја постигнавме големата цел за градење хиерархија, затоа не би сакале обвинувањата за жолтата куќа, обвинувањата за заеднички злосторнички потфат да ја оцрнат историјата на ослободителната војна.“
„Овој процес мора да заврши со невиност, бидејќи Хашим Тачи, Кадри Весели, Јакуп Красниќи, Реџеп Селими и војниците кои се зад решетки се обвинети за злосторства што не ги сториле. Го следевме целиот процес и ни трепереше кожата кога ги слушнавме обвинувањата што Белград и Москва ги упатија против нас, како криминалци и бандити. Ја сакавме слободата, но не со тоа што им ја негиравме слободата на другите народи“, рече Ахмети.
Тој исто така нагласи дека денешниот протест не е против државата Македонија, додавајќи дека поранешните водачи на ОВК кои се во Хаг придонеле за стабилноста и иднината на Северна Македонија.
Тој ги спомена и сведоштвата на генералот Весли Кларк, Џејмс Рубин и Кристофер Хил, за кои изрази благодарност.
„Благодарни сме за сведочењето на генералот Кларк, благодарни сме на Џејмс Рубин, како и на амбасадорот кој напорно работеше во регионот за мир и стабилност, Кристофер Хил“, рече Ахмети.
